ვაზიანი-გომბორი-თელავის საავტომობილო გზის სარეაბილიტაციო სამუშაოებზე ₾69 მლნ ტენდერი გამოცხადდა
საავტომობილო გზების დეპარტამენტმა ვაზიანი-გომბორი-თელავის საავტომობილო გზის კმ1-კმ 26მონაკვეთის სარეაბილიტაციო სამუშაოებზე 69 188 499 ლარის ტენდერი გამოაცხადა.
სატენდერო პირობების თანახმად, პროექტის ფარგლებში გათვალისწინებულია გზის საფარისა და მასზე არსებული ინფრასტრუქტურის სრული რეაბილიტაცია.
გამარჯვებულმა კომპანიამ სამუშაოები 24 თვის ვადაში უნდა დაასრულოს. ამას გარდა, შესრულებულ სამუშაოებზე მოქმედებს 3-წლიანი საგარანტიო ვადა, რომლის განმავლობაშიც მიმწოდებელი ვალდებულია წარმოქმნილი ხარვეზები საკუთარი სახსრებით აღმოფხვრას.
რაც შეეხება მოთხოვნებს, პრეტენდენტს შესრულებული უნდა ჰქონდეს ანალოგიური ტიპისა და სირთულის სამუშაოები, რომელთა ჯამური ღირებულება შესყიდვის ობიექტის სავარაუდო ღირებულების არანაკლებ 80%-ს შეადგენს. ტენდერში წინადადებების მიღება 11 ოქტომბერს დაიწყება და 16 ოქტომბერს დასრულდება.
BM.GE
წყარო: bm.ge