Visa მცირე ბიზნესისთვის სმარტფონების POS ტერმინალებად ქცევის ახალ ფუნქციებს ნერგავს

კომპანია Visa-მ Visa Accept-ისა და Visa Direct-ის ახალი ფუნქციები წარადგინა, რომლებიც მიზნად ციფრული გადახდების მიღებისა და გაგზავნის მიმართულებით სმარტფონების შესაძლებლობების გაფართოებას ისახავს.

კომპანიის ინფორმაციით, სიახლე განკუთვნილია განვითარებად ბაზრებზე მოქმედი მცირე და საშუალო ბიზნესებისთვის, რათა მათ გადახდების მიღება და წარმოება დამატებითი მოწყობილობების გარეშე, ნაცნობი ფინანსური ინსტრუმენტებით შეძლონ.

როგორც Visa-ს ცენტრალური და აღმოსავლეთ ევროპის, შუა აღმოსავლეთისა და აფრიკის (CEMEA) რეგიონის კომერციული და ფინანსურ ოპერაციათა გადაწყვეტილებების უფროსი ვიცე-პრეზიდენტი, შაჰებაზ ხანი განმარტავს, ინიციატივის მიზანი ბიზნესისთვის გადახდებთან დაკავშირებული ბარიერების შემცირებაა.

"ნათლად ჩანს მომავალი, როდესაც მერჩანტისთვის გადახდის მისაღებად და ბიზნესზე ინფორმაციის მოსაპოვებლად მხოლოდ ერთი სმარტფონი საკმარისი იქნება. შედეგად, ის გადახდების ბარიერების დაძლევაში ნაკლებ დროს დახარჯავს და შეძლებს, მომხმარებლის გამოცდილებაზე იზრუნოს", - აცხადებს შაჰებაზ ხანი.

Visa Accept-ის მეშვეობით, სმარტფონი ფუნქციურად უთანაბრდება ტერმინალს, რაც მიკრო და მცირე მეწარმეებს საშუალებას აძლევს, მიიღონ გადახდები სადებეტო ან წინასწარ გადახდილ ანგარიშებზე დამატებითი ტექნიკური მოწყობილობების გარეშე.

მყიდველს გადახდა შეხებით (Tap to Phone) ან სპეციალური ბმულის საშუალებით შეუძლია, ხოლო თანხა რეალურ დროში აისახება გამყიდველის ანგარიშზე. აღნიშნულ ტრანზაქციებზე ვრცელდება Visa-ს უსაფრთხოებისა და დაცვის სტანდარტები.

კომპანიის პროგნოზით, 2027 წლისთვის Visa Accept მსოფლიოს მასშტაბით მილიონობით მეწარმისთვის გახდება ხელმისაწვდომი.

მეორე გადაწყვეტილება, Visa Direct, ფინანსური ოპერაციების რეალურ დროში განხორციელების ინსტრუმენტს წარმოადგენს, რომელიც მცირე ბიზნესებს ტელეფონის საშუალებით თანხის გაცემას უმარტივებს.