ვლადიმერ პუტინი 19-20 მაისს ჩინეთს ეწვევა - კრემლი
რუსეთის პრეზიდენტი ვლადიმერ პუტინი 19-20 მაისს ჩინეთის სახალხო რესპუბლიკას ოფიციალური ვიზიტით ეწვევა. კრემლის პრესსამსახურის ინფორმაციით, რუსეთის ლიდერის ვიზიტი ჩინეთის პრეზიდენტის, სი ძინპინის მიწვევით შედგება.
რუსული მხარის განმარტებით, პუტინის ვიზიტი ეძღვნება ორ ქვეყანას შორის კეთილმეზობლობის, მეგობრობისა და თანამშრომლობის შესახებ ხელშეკრულების გაფორმების 25 წლისთავს, რაც ორმხრივი ურთიერთობების ფუნდამენტურ დოკუმენტს წარმოადგენს.
ვიზიტის ფარგლებში დაგეგმილია ლიდერების შეხვედრა, სადაც ვლადიმერ პუტინი და სი ძინპინი განიხილავენ ორმხრივი ურთიერთობების აქტუალურ საკითხებს, რუსეთსა და ჩინეთს შორის ყოვლისმომცველი პარტნიორობისა და სტრატეგიული თანამშრომლობის შემდგომი გაღრმავების გზებს. გარდა ამისა, მხარეები აზრს გაცვლიან ძირითად საერთაშორისო და რეგიონულ პრობლემებზე.
ორმხრივი მოლაპარაკებების გარდა, პროგრამა რამდენიმე ოფიციალურ ღონისძიებას ითვალისწინებს:
ორი ქვეყნის ლიდერი მონაწილეობას მიიღებს რუსეთისა და ჩინეთის განათლების წლების (2026–2027 წლები) გახსნის საზეიმო ცერემონიაში;
მოლაპარაკებების დასრულების შემდეგ იგეგმება უმაღლეს დონეზე ერთობლივი განცხადების ხელმოწერა;
ხელი მოეწერება არაერთ ორმხრივ სამთავრობო, უწყებათაშორის და სხვა სახის დოკუმენტს.
ვიზიტის ფარგლებში რუსეთის პრეზიდენტი ასევე შეხვდება ჩინეთის სახელმწიფო საბჭოს პრემიერს, ლი ციანს. კრემლის ცნობით, აღნიშნულ შეხვედრაზე მხარეები ორ ქვეყანას შორის სავაჭრო-ეკონომიკური თანამშრომლობის პერსპექტივებს განიხილავენ.
აღსანიშნავია, რომ 2017 წლის შემდეგ პირველად, აშშ-ის პრეზიდენტის ვიზიტი ჩინეთში მიმდინარე კვირაში 13-15 მაისს იმყოფებოდა. შემოდგომაზე კი სი ძინპინის აშშ-ში ვიზიტია დაგეგმილი.
BM.GE
წყარო: bm.ge