ვყალიბდებით ეკონომიკად, სადაც მაღალი ბრუნვები ქაღალდზე გენერირდება - გიორგი ხიშტოვანი
ეკონომისტ გიორგი ხიშტოვანის შეფასებით, საქართველოს ეკონომიკური ზრდა მეტწილად კვლავ “ვირტუალურია” და ისეთი დარგების ხარჯზე იზრდება, რომელთაც მოსახლეობის ფართო სეგმენტზე დადებითი გავლენა ნაკლებად აქვს.
როგორც ხიშტოვანი BMG-სთან მარტში დაფიქსირებული 10.7%-იანი ეკონომიკური ზრდის შეფასებისას აცხადებს, იმ ფონზე, როდესაც ქვეყანაში სხვადასხვა მიმართულებით არაერთი გამოწვევა ფიქსირდება, მსგავსი მაღალი ზრდის ტემპი უცნაურია.
მისივე თქმით, ეკონომიკურ ზრდაში მაღალი წვლილი აქვთ ისეთ დარგებს, რომელთა მდგრადობაც კითხვის ნიშნის ქვეშ დგას.
“რამდენიმე ფაქტორი მინდა გამოვარჩიო, რატომ არის უცნაური ეს შედეგი [მარტში 10.7%-იანი ეკონომიკური ზრდა]. პირველ რიგში, ეს ეხება კრიზისს რეგიონში და შესაბამისად იმ ეფექტებს, რომელიც ვიცით, რომ უკვე აისახა ეკონომიკაზე, ვგულისხმობ ძირითადად სტუმართმასპინძლობის სექტორს და მასთან დაკავშირებულ დარგებს. ეს არის ერთი მიზეზი, რატომაც უნდა გაგვიკვირდეს ეს შედეგი.
მეორე მიზეზი არის სახელმწიფო ხარჯები. ვხედავთ, რომ ჩამორჩენაა მნიშვნელოვანი, ანუ სახელმწიფო ისევ ვერ ახერხებს დაგეგმილი ხარჯების გაწევას. პირველი სამი თვის განმავლობაში, 700 მილიონიანი ჩამორჩენაა ხარჯვით ნაწილში.
და ზოგადად პოლიტიკური ფონი, რომელიც არ უნდა უწყობდეს წესით ხელს ეკონომიკური ზრდის მაღალ მაჩვენებელს. მიუხედავად ამისა, მაღალი ზრდა ფიქსირდება. ვეჭვობ, რომ ისევ ICT სექტორი იქნება მნიშვნელოვანი კონტრიბუტორი ამ ზრდის, როგორც წინა წლის პირველ კვარტალში იყო. ამიტომ მნიშვნელოვანია დაველოდოთ ჩაშლილ ინფორმაციას, რომელიც დაახლოებით ერთ თვეში გვექნება. მე მგონია, რომ ამ მაღალი ზრდის დიდი წილი მოდის სწორედ ICT სექტორის არანორმალურ ზრდაზე.
ამას ემატება ასევე გარე ეფექტები - ჩვენ უცბად გავხდით ნავთობექსპორტიორები და, რა თქმა უნდა, ეს ფაქტორი არის მნიშვნელოვანი. წარმოიდგინეთ, ჩვენ შემოვიტანეთ ნედლი ნავთობი და კომპანიების ერთობლიობამ, ან შეიძლება ერთმა კომპანიამ დააგენერირა დაახლოებით 500-600 მილიონიანი ბრუნვა, როგორც ჩანს, იმიტომ რომ 200 მილიონი დოლარის ღირებულების ნავთობია საქართველოში შემოტანილი და შემდეგ გაიტანეს [ექსპორტზე] ნავთობი. შესაბამისად, კიდევ ერთი ფაქტორი გაჩნდა ქაღალდზე [ეკონომიკური ზრდისთვის].