WhatsApp მომხმარებლებს, ნომრების ნაცვლად, username-ებით კომუნიკაციის საშუალებას მისცემს
სამესიჯო აპლიკაცია WhatsApp-ი ახალ ფუნქციას ნერგავს, რომელიც მომხმარებლებს საშუალებას მისცემთ, ერთმანეთს ტელეფონის ნომრის გამჟღავნების გარეშე, მხოლოდ უნიკალური მომხმარებლის სახელების (usernames) გაცვლით დაუკავშირდნენ.
კომპანიის განცხადებით, ეს ფუნქცია გლობალურად ჩაეშვება და პლატფორმის სამ მილიარდამდე მომხმარებლისთვის მომდევნო რამდენიმე თვის განმავლობაში გახდება ხელმისაწვდომი.
მიმდინარე კვირიდან მომხმარებლებს აპლიკაციაში სასურველი სახელის დაჯავშნა უკვე შეუძლიათ, თუმცა ეს სავალდებულო არ იქნება. კომპანიაში აცხადებენ, რომ მომხმარებლებს საკუთარი სახელის წაშლა ან შეცვლა ნებისმიერ დროს შეეძლებათ.
ფუნქციის სრულად გააქტიურების შემდეგ, WhatsApp-ის მომხმარებლები დაკავშირებას მხოლოდ სახელების გაცვლით შეძლებენ.
მომხმარებლის სახელის სიგრძე მაქსიმუმ 35 სიმბოლოთი განისაზღვრება და შეზღუდვები მინიმალური იქნება, გარდა გავლენიანი ოფიციალური პირებისა და ცნობილი ადამიანების სახელებისა, რომლებიც სხვებისთვის ხელმისაწვდომი არ იქნება.
Meta-ს მფლობელობაში არსებულმა კომპანიამ ახალი ფუნქცია კონფიდენციალურობის დაცვის საშუალებად შეაფასა.
ელის ნიუტონ-რექსმა, WhatsApp-ის პროდუქტების განყოფილების ხელმძღვანელმა, აღნიშნა, რომ მომხმარებლებისგან ხშირად ესმოდათ, რომ მათ სხვებთან დასაკავშირებლად საკუთარი ტელეფონის ნომრის გაზიარება ყოველთვის არ სურდათ, განსაკუთრებით ჯგუფურ ჩატებში.
მან იმედი გამოთქვა, რომ ეს ფუნქცია "მომხმარებლებს მისცემს კონტროლს იმაზე, თუ როგორ სურთ გამოჩნდნენ" აპლიკაციაში.
როგორ უნდა დაჯავშნოთ მომხმარებლის სახელი?
Meta-ს განცხადებით, WhatsApp-ის მომხმარებლის სახელები "მომდევნო თვეების განმავლობაში ეტაპობრივად" ჩაეშვება და მომხმარებლებს მიუვათ შეტყობინება, როდესაც მათი სახელის ფუნქცია გააქტიურდება.