X-მა დამოუკიდებელი მესენჯერი XChat-ი წარადგინა

მსოფლიოში უმდიდრესი ადამიანის, ილონ მასკის სოციალურმა ქსელმა X-მა iOS-ის მომხმარებლებისთვის დამოუკიდებელი აპლიკაცია XChat-ი წარადგინა. პლატფორმა ერთმანეთთან დაკავშირებულ ადამიანებს შორის მიმოწერას, ფაილების გაზიარებასა და აუდიო-ვიდეო ზარების განხორციელებას უზრუნველყოფს. აღსანიშნავია, რომ ეს სიახლე ილონ მასკის “ყოვლისმომცველი აპლიკაციის“ შექმნის ერთ-ერთი პირველი ეტაპია. არსებული ინფორმაციით, მას მალე დაემატება საგადასახადო სისტემა.

ახალი მესენჯერი მომხმარებლებს შეტყობინებების რედაქტირების, მათი წაშლისა და ე.წ. სკრინშოტების გადაღების დაბლოკვის ფუნქციებს სთავაზობს. როგორც კომპანიაში აცხადებენ, XChat-ი სრულად არის დაცული რეკლამებისა და თრექინგის მექანიზმებისგან. X-ში ამტკიცებენ, რომ აპლიკაციას აქვს ე.წ. end-to-end დაშიფვრის სისტემა, რათა მესამე პირმა ვერ შეძლოს მიმოწერაზე წვდომა. ამასთან, აპლიკაციის გამოსაყენებლად რეკომენდირებულია PIN-კოდის ქონა. მიუხედავად კომპანიის მტკიცებისა, უსაფრთხოების ექსპერტები მასკის სოციალური მედიის პლატფორმის სანდოობას ეჭვქვეშ აყენებენ.

აღსანიშნავია, რომ XChat-ის გამოსვლასთან ერთად ცვლილებები შევიდა თავად პლატფორმა X-შიც, რომელსაც ფუნქციების ნაწილი გაუუქმდა. არსებული ინფორმაციით, ყველა იმ საკომუნიკაციო ინსტრუმენტის გამოყენებას, რაც X-ზე აღარაა ხელმისაწვდომი, მომხმარებლები სწორედ ახალ მესენჯერში შეძლებენ. ეს ნაბიჯი მიზნად XChat-ის მომხმარებელთა რაოდენობის სწრაფ ზრდას ისახავს. პროექტის წამყვანი დიზაინერი, ბენჯი ტეილორი აცხადებს, რომ მესენჯერის განვითარება კიდევ უფრო აქტიურ ფაზაში შევა და ის მომხმარებლებთან ურთიერთობის სრულიად ახალ გამოცდილებას შექმნის.