ყაზახეთი და აზერბაიჯანი კასპიის ზღვაზე სამგზავრო მიმოსვლას აღადგენენ
ყაზახეთი და აზერბაიჯანი აქთაუსა და ბაქოს პორტებს შორის რეგულარულ სამგზავრო საზღვაო მიმოსვლას აღადგენენ. ინიციატივით ყაზახური მხარე გამოვიდა და ოფიციალურმა ბაქომ წინადადებას მხარი დაუჭირა. აზერბაიჯანში ყაზახეთის ელჩის განცხადებით, ორმხრივი სამგზავრო კავშირის უმოკლეს ვადაში ასამოქმედებლად ორივე ქვეყნის სატრანსპორტო უწყებებმა მუშაობა უკვე დაიწყეს.
როგორც აზერბაიჯანული მედია წერს, ეს გადაწყვეტილება ორ ქვეყანას შორის ტურისტული კავშირების გაღრმავებას ხელს შეუწყობს და კასპიის ზღვაზე სამგზავრო გადაყვანების მასშტაბს გააფართოებს. საყურადღებოა, რომ ეს ინიციატივა ტრანსკასპიური საერთაშორისო სატრანსპორტო მარშრუტის, ანუ შუა დერეფნის ფარგლებში თანამშრომლობის გაღრმავებასთან არის დაკავშირებული. ეს სატრანსპორტო არტერია ცენტრალურ აზიას სამხრეთ კავკასიასთან და ევროპულ ბაზრებთან აკავშირებს.
ცნობისთვის, აქთაუსა და ბაქოს პორტებს შორის სამგზავრო მიმოსვლა პანდემიის გამო 2020 წელს შეწყდა. შეზღუდვების დაწესებამდე, ამ საზღვაო მარშრუტით წელიწადში დაახლოებით 1,500 ადამიანი მგზავრობდა.
BM.GE
წყარო: bm.ge