ყოფილმა დიპლომატებმა "საქართველოს დიპლომატთა საზოგადოება" დააფუძნეს|მისია

ყოფილმა დიპლომატებმა "საქართველოს დიპლომატთა საზოგადოება" [DSG] დააფუძნეს. DSG აერთიანებს სხვადასხვა თაობის კარიერულ დიპლომატებს, რომლებმაც საქართველოს კონსტიტუციის 78-ე მუხლისა და დემოკრატიული ღირებულებების ერთგულების საფუძველზე, დატოვეს დიპლომატიური სამსახური, ან უსამართლოდ იქნენ გათავისუფლებულნი.

"საზოგადოება თავისი საქმიანობით მიზნად ისახავს პროფესიული გამოცდილებისა და დაგროვილი ინსტიტუციური მეხსიერების საფუძველზე საგარეო პოლიტიკური მოვლენების ანალიზს და ფართო საზოგადოების ინფორმირებას. ამავდროულად, საზოგადოების ერთ-ერთ პრიორიტეტს წარმოადგენს დეზინფორმაციასა და პროპაგანდაზე რეაგირება, რაც მიმართულია საქართველოს კონსტიტუციით განსაზღვრული საგარეო-პოლიტიკური კურსის დისკრედიტაციისა და საზოგადოებაში არსებული ეროვნული კონსენსუსის რღვევისაკენ.

საზოგადოების წევრებს მტკიცედ სწამთ, რომ ევროპული და ევროატლანტიკური ინტეგრაცია წარმოადგენს საქართველოს სუვერენიტეტის განმტკიცების, ტერიტორიული მთლიანობის დაცვის, დემოკრატიული განვითარებისა და კეთილდღეობის საფუძველს.

საზოგადოება მოქმედებს სამოქალაქო პასუხისმგებლობით და ხელმძღვანელობს ეროვნულ ინტერესებსა და საერთო პროფესიულ ღირებულებებზე დაფუძნებული ხედვით.

საზოგადოება ღიაა ყველა დიპლომატისთვის, რომელიც იზიარებს ორგანიზაციის მისიის სულისკვეთებას, ხედვას და ფასეულობებს", - წერია საზოგადოების განაცხადში.

საზოგადოებას ამ ეტაპისთვის 30-ზე მეტი ყოფილი დიპლომატი უერთდება.