ზელენსკიმ აშშ-ში სამშვიდობო მოლაპარაკებებისთვის მთავარი მომლაპარაკებელი მიავლინა

უკრაინის ეროვნული უსაფრთხოებისა და თავდაცვის საბჭოს მდივანი, რუსტემ უმეროვი აშშ-ში დონალდ ტრამპის წარმომადგენლებთან შესახვედრად გაემგზავრა. როგორც ირკვევა, ვიზიტის ფარგლებში უმეროვი ტრამპის სპეციალურ წარმომადგენელ სტივ ვიტკოფსა და ჯარედ კუშნერს შეხვდება. აღსანიშნავია, რომ მოლაპარაკებები ვაშინგტონის შუამავლობით მიმდინარე მოსკოვი-კიევის დიალოგის ჩიხში შესვლის ფონზე დაიგეგმა. უკრაინული მხარე მიზნად დიპლომატიური და უსაფრთხოების საკითხების განხილვას ისახავს.

მნიშვნელოვანია ითქვას, რომ კიევში აშშ-ის პრიორიტეტების ცვლილების გამო შეშფოთებას გამოთქვამენ. ვოლოდიმირ ზელენსკის განცხადებით, თეთრმა სახლმა ყურადღება გადაიტანა ირანზე, რამაც რუსეთზე საერთაშორისო ზეწოლა დაასუსტა. პარალელურად, უკრაინის პრეზიდენტმა სტივ ვიტკოფის მხრიდან მოსკოვში გახშირებული ვიზიტები გააკრიტიკა. როგორც ცნობილია, ამერიკელი დიპლომატი რუსეთის დედაქალაქს რვაჯერ ეწვია, თუმცა კიევში ჩასვლაზე ამ დრომდე უარს ამბობს.

რაც შეეხება მოლაპარაკებების შინაარსს, მხარეებს შორის ფუნდამენტური უთანხმოება ნარჩუნდება. ვლადიმერ პუტინი უკრაინისგან დონბასის რეგიონიდან ჯარების გაყვანას კატეგორიულად მოითხოვს. ამის საპირისპიროდ, კიევი ომის არსებული კონტაქტის ხაზის გასწვრივ დასრულების მომხრეა. პრეზიდენტის თქმით, უკრაინა არ დათმობს იმ მიწებს, რომლებიც მოსკოვს სამხედრო გზით არ აუღია. არსებული ინფორმაციით, აშშ-ის მხრიდან შეთავაზებული "სააღდგომო ულტიმატუმი" და ტყვეების გაცვლის მცდელობაც წარუმატებელი აღმოჩნდა.

ცნობისთვის, უკრაინისა და რუსეთის წარმომადგენლებს შორის ვაშინგტონის შუამავლობით მოლაპარაკებები გასულ წელს დაიწყო. პროცესში თეთრი სახლის მხრიდან ძირითად როლს დონალდ ტრამპთან დაახლოებული პირები ასრულებენ.