ზელენსკის ადმინისტრაციის ყოფილი უფროსი, ანდრეი ერმაკი დააკავეს

უკრაინაში პრეზიდენტ ვოლოდიმირ ზელენსკის ადმინისტრაციის ყოფილი უფროსი, ანდრეი ერმაკი დააკავეს. იგი ფულის გათეთრების ბრალდებით ხუთშაბათს აიყვანეს. ანტიკორუფციული სააგენტოები ერმაკს კიევის მახლობლად, ელიტარული საცხოვრებელი პროექტის მეშვეობით $10.5 მილიონის გათეთრებაში სდებენ ბრალს. საყურადღებოა, რომ ანტიკორუფციულმა სასამართლომ ბრალდებულს 140 მილიონი გრივნის ($3.2 მლნ.) ოდენობის გირაო შეუფარდა.

აღსანიშნავია, რომ ერმაკის დაკავება ფართომასშტაბიანი ოპერაცია "მიდასის" ნაწილია. გამოძიება ამ კოდური სახელით გასული წლის ნოემბრიდან მიმდინარეობს. საქმის მთავარ ფიგურანტად ზელენსკის ყოფილი ბიზნესპარტნიორი ტიმურ მინდიჩი მიიჩნევა. მას ენერგეტიკულ სექტორში $100-მილიონიანი კორუფციული სქემის აწყობაში ადანაშაულებენ. ცნობისთვის, მინდიჩმა უკრაინა დატოვა და ამჟამად ისრაელში იმყოფება.

რაც შეეხება თავად ბრალდებულს, ანდრეი ერმაკი დანაშაულს არ აღიარებს. იგი სასამართლოს გადაწყვეტილების გასაჩივრებას გეგმავს. ერმაკმა განაცხადა, რომ გირაოს თანხა არ აქვს. მისი განმარტებით, თანხის მოძიებას ადვოკატები მეგობრების დახმარებით შეეცდებიან.

ცნობისთვის, ანდრეი ერმაკი გადადგომამდე უკრაინის მეორე ყველაზე გავლენიან პირად ითვლებოდა. ყოფილი კინოპროდიუსერი პრეზიდენტის ადმინისტრაციას ხელმძღვანელობდა. ის ასევე აშშ-ის შუამავლობით რუსეთთან გამართულ მოლაპარაკებებში კიევის მთავარი წარმომადგენელი იყო.

პრეზიდენტის ადმინისტრაციაში ერმაკის დაკავებასთან დაკავშირებით კომენტარს ჯერჯერობით არ აკეთებენ.