რუსეთში დრონების შეტევის შემდეგ „გაზპრომის“ ნავთობგადამამუშავებელ კომპლექსში ხანძარი გაჩნდა
რუსეთის ბაშკორტოსტანის რესპუბლიკაში დრონებით განხორციელებული შეტევის შემდეგ, „გაზპრომ ნეფტეხიმ სალავატის“ ნავთობგადამამუშავებელ კომპლექსში აფეთქებები და ხანძარი დაფიქსირდა. ამის შესახებ ადგილობრივი წყაროები და სოციალური ქსელების მომხმარებლები იუწყებიან.
არსებული ინფორმაციით, შეტევის სამიზნე სწორედ „გაზპრომ ნეფტეხიმ სალავატი“ იყო. ადგილობრივების თქმით, აფეთქებების ხმა რამდენჯერმე გაისმა. საწარმო რუსეთის ერთ-ერთი უმსხვილესი ნავთობგადამამუშავებელი და ნავთობქიმიური კომპლექსია, რომელიც წელიწადში დაახლოებით 10 მილიონ ტონა ნავთობს ამუშავებს.
ამასთან, აფეთქებების შესახებ ცნობები ვრცელდება კრასნოდარის მხარის ქალაქ გელენჯიკიდანაც. გავრცელებული ინფორმაციით, აფეთქებების შემდეგ აეროპორტის მიმდებარე ტერიტორიაზე ძლიერი ხანძარი გაჩნდა.
რუსეთის ხელისუფლებას მომხდართან დაკავშირებით ოფიციალური ინფორმაცია ჯერჯერობით არ გაუვრცელებია. ასევე უცნობია, არის თუ არა დაშავებულები და რა მასშტაბის ზიანი მიადგა ობიექტებს.
ფორმულა
წყარო: formulanews.ge