უკრაინულმა დრონებმა რუსეთის რეგიონებზე მორიგი იერიშები მიიტანეს

27 ივლისის ღამეს უკრაინულმა უპილოტო საფრენმა აპარატებმა რუსეთის ბელგოროდსა და როსტოვ-ნა-დონუზე იერიში მიიტანეს. ადგილობრივი ხელისუფლების ინფორმაციით, ორივე ქალაქში არიან დაღუპულები და დაშავებულები, ასევე დაზიანებულია საცხოვრებელი სახლები და სხვა ინფრასტრუქტურა.

ბელგოროდის საოლქო ოპერატიული შტაბის ცნობით, დრონების მასირებული შეტევის შედეგად 12 ადამიანი დაშავდა, მათ შორის ორი ბავშვი. ნაწილობრივ დაინგრა კერძო საცხოვრებელი სახლი, დაზიანდა რამდენიმე მრავალბინიანი კორპუსი, ხანძარი გაჩნდა ბინებსა და 15-ზე მეტ ავტომობილში. ადგილობრივი მედიის ინფორმაციით, ერთ-ერთი უპილოტო აპარატი ქალაქის ცენტრში, ФСБ-ის რეგიონული სამმართველოს შენობასთან ახლოს ჩამოვარდა. შეტევის შემდეგ ქალაქის ნაწილს ელექტროენერგია და წყალმომარაგება შეუწყდა.

ამავე ღამეს დრონებით იერიში მიიტანეს როსტოვ-ნა-დონუზეც. როსტოვის ოლქის გუბერნატორის, იური სლიუსარის განცხადებით, თავდასხმას ორი ადამიანი, ცოლ-ქმარი, ემსხვერპლა, ხოლო ხუთი მშვიდობიანი მოქალაქე დაშავდა. მათგან ორი, მათ შორის ერთი მოზარდი, მძიმე მდგომარეობაშია.

გუბერნატორის თქმით, ქალაქის რამდენიმე რაიონში დაზიანდა შენობები, დრონების ჩამოვარდნის შედეგად კი ხანძარი გაჩნდა კერძო საწარმოს ტერიტორიაზე, სასაწყობე ნაგებობებსა და საცხოვრებელ სახლებთან. მაშველები ცეცხლის ლიკვიდაციას აგრძელებენ.