აშშ-ის ქალაქ სიეტლში ფესტივალზე მომხდარ სროლას სამი ადამიანი ემსხვერპლა

აშშ-ის ქალაქ სიეტლში, ყოველწლიურ გასტრონომიულ ფესტივალ „Bite of Seattle“-ზე მომხდარ სროლას სამი ადამიანი ემსხვერპლა, ხოლო ოთხი დაშავდა, მათ შორის 2 წლის ბავშვი.

ადგილობრივი პოლიციის ინფორმაციით, სროლა კვირას, დაახლოებით 18:00 საათზე დაიწყო. დაღუპულთაგან ორი ადამიანი ადგილზე გარდაიცვალა. დაშავებულები საავადმყოფოში გადაიყვანეს და ექიმების ცნობით, მათი მდგომარეობა ამ დროისთვის სტაბილურია.

სამართალდამცველებმა ერთი ეჭვმიტანილი უკვე დააკავეს, თუმცა მეორე თავდამსხმელს კვლავ ეძებენ. გამოძიების წინასწარი ვერსიით, სროლა ორ პირს შორის ურთიერთდაპირისპირებას მოჰყვა, რომლებიც ერთმანეთს ესროდნენ.

სიეტლის პოლიციის უფროსის თანაშემწის, ტაირონ დევისის განცხადებით, მიუხედავად იმისა, რომ ერთ-ერთი ეჭვმიტანილი კვლავ მიმალვაშია, მოსახლეობას ამ ეტაპზე საფრთხე არ ემუქრება.

სროლის დაწყებისას ფესტივალის სტუმრები ქალაქის ერთ-ერთ მთავარ ღირსშესანიშნაობას, Space Needle-ს აფარებდნენ თავს. პოლიციამ და ფესტივალის უსაფრთხოების სამსახურმა ტერიტორიიდან როგორც ფესტივალის, ისე სიეტლის ცენტრში მყოფი მოქალაქეების ევაკუაცია დაიწყეს.