ბლოგერ თორნიკე რაზმაძეს სოცქსელში დაწერილი კომენტარისთვის ჯარიმა ან პატიმრობა ემუქრება

შინაგან საქმეთა სამინისტრომ სამოქალაქო აქტივისტის, თორნიკე რაზმაძის წინააღმდეგ ადმინისტრაციული საქმის წარმოება დაიწყო. საქმე ეხება რაზმაძის მიერ სოციალურ ქსელში დაწერილ კომენტარს.

როგორც თორნიკე რაზმაძე ვიდეომიმართვაში აღნიშნავს, საქართველოს შინაგან საქმეთა სამინისტრო მას „რუსი პროპაგანდისტების“ მისამართით შეურაცხყოფას ედავება.

„არ დაიჯერებთ, რის გამო აღძრეს საქმე და მიბარებენ სასამართლოში, რათა ან დამაპატიმრონ ან უზარმაზარი ჯარიმა გამომიწერონ. საქართველოს შინაგან საქმეთა სამინისტრო მედავება იმას, რომ რუს პროპაგანდისტებს, მარგარიტა სიმონიანს და ვლადიმერ სალავიოვს რატომ მიაყენე შეურაცხყოფა და რატომ აგინეო.

საქმე ეხება ჩემს მიერ რამდენიმე კვირის წინ განთავსებულ ვიდეოს: მარგარიტა სიმონიანი დგას სხვა რუსი პროპაგანდისტების გარემოცვაში და დაგვცინის ქართველებს, პირველ რიგში, ერეკლე მეორეს და ასეთ რაიმეს ამბობს: როგორც ერეკლე მეორე მოვიდაო და „გეორგიევსკის ტრაქტატით“ რუსებს მუხლებზე დამდგარი გვეხვეწებოდა მფარველობის ქვეშ მიღებას, სხვა ქართველებიც, ახალი „ირაკლებიც“ ასე მოვლენ და მუხლებზე დამდგარი მოფორთხდებიან და შეგვეხვეწებიან მფარველობის ქვეშ მივიღოთო. ამაზე იყო ჩემი პასუხი: „ერთი თქვენი დედაც „ნაკალენიახ“-მეთქი.

ახლანდელი „ქართული ოცნების“ წარმომადგენლების შეურაცხყოფაც არის ეს. ახლა აღარ არის ერეკლე პაპა დასაცავი?! ეს არ იყო მისი შეურაცხყოფა?! ამაზე მეტი შეურაცხყოფა სად მოგისმენიათ, როდესაც რუსი პროპაგანდისტები უწოდებენ მუხლებზე მფორთხავ მეფეს და ღლიცინებენ. თურმე, როგორ დავწერე კომენტარი ეს უნდა გაირჩეს სასამართლოზე, დამიჭერენ თუ დამაჯარიმებენ. ეს არაა პრობლემა, პრობლემაა გზავნილი, რასაც „ქართული ოცნება“ გვიგზავნით, თურმე რუსი პროპაგანდისტებისთვის შეურაცხმყოფელი რაღაცების თქმა არ შეიძლება“,- აღნიშნა რაზმაძემ.