რა ხდება იმ შემთხვევაში თუ მოსწავლე სკოლაში ფორმის გარეშე მივა - გივი მიქანაძის განმარტება

"ქართული ოცნების" განათლების მინისტრმა გივი მიქანაძემ სასკოლო ფორმების შესახებ ჩაწერილ ვიდეომიმართვაში განმარტა, თუ რა მოხდება მაშინ როცა მოსწავლე სკოლაში ფორმის გარეშე გამოცხადდება.

მიქანაძის თქმით, ფორმის შემოღება თანასწორობას და სასწავლო გარემოს გაუმჯობესებას ემსახურება.

"სკოლა მშობელთან კომუნიკაციისა და თანამშრომლობის გზით დაადგენს ამის მიზეზებს. თუ ბავშვს ჯანმრთელობის მდგომარეობის გამო არ შეუძლია ფორმის ტარება, მშობელი წარმოადგენს შესაბამის სამედიცინო ცნობას, რის საფუძველზეც მოსწავლე თავისუფლდება ფორმის ტარებისგან და მას მხოლოდ შინაგანაწესით დადგენილი ჩაცმის წესის დაცვა მოეთხოვება.

თითოეული ასეთი შემთხვევა განიხილება ინდივიდუალურად ბავშვის ჯანმრთელობისა და საუკეთესო ინტერესების გათვალისწინებით.

იმ შემთხვევაში თუ მშობელი ვერ ასაბუთებს რატომ ამბობს მოსწავლე უარს სასკოლო ფორმის ტარებაზე, საკითხი დარეგულირდება სკოლის შინაგანაწესის შესაბამისად.

კიდევ ერთხელ აღვნიშნავ, რომ თითოეული შემთხვევა განიხილება სკოლაში მოქმედი წესებისა და დისციპლინური პროცედურების ფარგლებში, მოსწავლის საუკეთესო ინტერესისა და აღმზრდელობითი მიდგომების გათვალისწინებით", - თქვა მიქანაძემ.