კობა ფარტენაძის მიმართ ძალადობისა და მუქარისთვის ბრალდებულები გირაოთი გათავისუფლდნენ

ბათუმის საქალაქო სასამართლოში მოსამართლე ეკატერინე კულულაშვილმა კობა ფარტენაძეზე დისკრიმინაციული ნიშნით ძალადობის და მუქარის საქმეზე ბრალდებული ორივე პირს გირაო შეუფარდა და არ დააპატიმრა.

ინფორმაციას ბათუმელები ავრცელებს და წერს, რომ გირაოს გადახდის შემთხვევაში ისინი დღესვე გათავისუფლდებიან.

შინაგან საქმეთა სამინისტროს განცხადებით, 11 აგვისტოს აჭარის ტელევიზიის თანამშრომლის, კობა ფარტენაძის მიმართ ბათუმში მომხდარ ძალადობისა და მუქარის ფაქტებზე 2 პირი დააკავეს.

“გამოძიებით დადგინდა, რომ ერთ-ერთმა დაკავებულმა, რომელსაც ძალადობა ედება ბრალად, მიმდინარე წლის 9 აგვისტოს, ურთიერთშელაპარაკებისას, ბათუმში ერთ პირს ფიზიკური შეურაცხყოფა მიაყენა, მომხდარიდან მალევე, მას ბრალდებულის სახით დაკავებული კიდევ ერთი პირი დანის გამოყენებით დაჭრით დაემუქრა", - განაცხადეს შსს-ში.

გამოძიება სისხლის სამართლის კოდექსის 126-ე და 151-ე მუხლებით მიმდინარეობს.

ორივე ბრალდებულს დაეკისრა პოლიციაში გამოცხადების ვალდებულება, ასევე აეკრძალათ დაზარალებულთან კომუნიკაცია.