ამერიკული და სადაზვერვო უწყებები ახლო აღმოსავლეთში ძალების შესაძლო შემცირებას განიხილავენ

ამერიკულ სამხედრო და სადაზვერვო წრეებში მიმდინარეობს არაფორმალური განხილვები ახლო აღმოსავლეთში განთავსებული პერსონალისა და სამხედრო ობიექტების რაოდენობის შესაძლო შემცირების შესახებ, იმ შემთხვევაში, თუ ტრამპის ადმინისტრაცია ირანთან კონფლიქტის დასრულებას შეძლებს. აღნიშნულის შესახებ ინფორმაციას CNN-ი ავრცელებს.

2001 წლის 11 სექტემბრის თავდასხმების შემდეგ, აშშ-მა ექსპონენციალურად გაზარდა მუდმივი სამხედრო და სადაზვერვო ობიექტების ქსელი ომებისა და დარტყმების განსახორციელებლად ისეთ ქვეყნებში, როგორებიცაა ერაყი, ავღანეთი, სირია, ირანი, იემენი და ლიბია.

თუმცა, ირანთან ბოლოდროინდელმა ბრძოლებმა გამოავლინა ამერიკული ინფრასტრუქტურის ღრმა მოწყვლადობა ახლო აღმოსავლეთში, რადგან მრავალი ეს ობიექტი მუდმივი ირანული თავდასხმების სამიზნე გახდა არაპოპულარულ ომში, რომელმაც უკვე 18 ამერიკელი სამხედროს სიცოცხლე შეიწირა.

სამხედრო და სადაზვერვო ოფიციალისტების თქმით, ეს განხილვები ნაწილობრივ იმის პროგნოზირებას ისახავს მიზნად, თუ რა შეიძლება იყოს მისაღები პრეზიდენტისთვის, რომელსაც ომისშემდგომი მომავლისთვის მკაფიო სტრატეგია არ წარუდგენია და რომელსაც საზღვარგარეთ ამერიკული ძალების შემცირება თავის პოლიტიკურ იდენტობად აქვს ქცეული.

ეს დისკუსიები მიმდინარეობს იმ ფონზეც კი, როდესაც ახლო აღმოსავლეთში ჯერ კიდევ 50 000 ამერიკელი სამხედრო და დიდი რაოდენობით სამხედრო ტექნიკა რჩება, მათ შორის ორი ავიამზიდი და ათზე მეტი მართვადი რაკეტებით შეიარაღებული გამანადგურებელი. ამავდროულად, აშშ-ის სამხედრო უწყება აფასებს იმასაც, თუ როგორ გაამაგროს დარჩენილი ძალების თავდაცვა ომის დასრულების შემდეგაც. ორი წყაროს ცნობით, განიხილება ზოგიერთი ინსტალაციის მიწისქვეშ გადატანა, რათა უკეთ დაიცვან ისინი სარაკეტო და დრონებით თავდასხმებისგან.