საპატრიარქო დონბასში მებრძოლი ბატალიონისთვის ბერ გაბრიელის სახელის დარქმევას ემიჯნება
საქართველოს საპატრიარქო მკვეთრად ემიჯნება დონეცკის მიმართულებით, რუსეთის მხარეს მებრძოლი სამხედრო დანაყოფისთვის წმინდა ბერ გაბრიელის (ურგებაძე) სახელის დარქმევის ფაქტს.
საპატრიარქოს საზოგადოებასთან ურთიერთობის სამსახურის უფროსის, დეკანოზ ანდრია ჯაღმაიძის განცხადებით, ეკლესიასთან ყოველგვარი კონსულტაციის გარეშე მიღებული ეს გადაწყვეტილება კატეგორიულად მიუღებელია, ხოლო წმინდანის სახელის სამხედრო მოქმედებების გამართლებისთვის გამოყენება მიკერძოებულ სპეკულაციას წარმოადგენს. საპატრიარქოში შეშფოთება გამოთქვეს იმის გამოც, რომ ინიციატივას მხარს რუსული ეკლესიის ცალკეული სასულიერო პირებიც უჭერენ.
დონბასში მებრძოლი ბატალიონისთვის ბერ გაბრიელის სახელის მინიჭების შესახებ ინფორმაცია მიმდინარე წლის იანვარში გავრცელდა. 8 სექტემბერს კი გავრცელდა ცნობა, რომ საქართველოდან ჩასულმა „მოხალისეებმა“, მათ შორის პროსახელისუფლებო მედიასპიკერმა ბესიკ დანელიამ, აღნიშნულ დანაყოფს მოტოციკლები და სამლოცველო ოთახები გადასცეს.
საპატრიარქო ხაზგასმით აღნიშნავს, რომ წმინდა გაბრიელის ცხოვრება სიყვარულისა და ქრისტიანული სარწმუნოების ქადაგებას ემსახურებოდა და მისი სახელის სამხედრო კონფლიქტში გამოყენება სრულიად ეწინააღმდეგება ეკლესიის პრინციპებს.
ფორმულა
წყარო: formulanews.ge