აშშ-მა რუსეთის VTB ბანკს ირანის სანქციების გვერდის ავლის გამო ახალი შეზღუდვები დაუწესა

ამერიკის შეერთებული შტატების ფინანსთა სამინისტრომ რუსეთის სიდიდით მეორე სახელმწიფო ბანკს, „ვითიბი ბანკს“ (VTB), ირანის წინააღმდეგ დაწესებული სანქციების გვერდის ავლის მცდელობებში მონაწილეობის გამო დამატებითი შეზღუდვები დაუწესა.

უწყების ოფიციალურ განცხადებაში აღნიშნულია, რომ რუსულმა ფინანსურმა ინსტიტუტმა ირანში წარმომადგენლობითი ოფისები გახსნა, სანქცირებული ირანული ბანკების ტრანზაქციები დაამუშავა და უზრუნველყო მილიარდობით დოლარის ოდენობის გაყინული ირანული აქტივების გადატანა.

აშშ-ის ხაზინის სანქციებზე ზედამხედველობის განყოფილების ყოფილი თანამდებობის პირისა და ანალიტიკოსის, მიად მალეკის შეფასებით, VTB-ს წინააღმდეგ გადადგმული ეს ნაბიჯი პირდაპირ უნდა განვიხილოთ, როგორც ვაშინგტონის ირიბი ზეწოლა ჩინეთზე, სადაც ირანული ნავთობის გაყიდვიდან მიღებული შემოსავლების მნიშვნელოვანი ნაწილი ინახება.

მალეკი განმარტავს, რომ „ვითიბი ბანკი“ ერთადერთი რუსული ბანკია, რომელიც კონტინენტურ ჩინეთში ოფიციალურ ფილიალს ფლობს და წვდომა აქვს ქვეყნის შიდა გადახდის სისტემასთან. ჩინური ფინანსური ინსტიტუტები VTB-სთან საქმიან ურთიერთობას აქამდეც აგრძელებდნენ, მიუხედავად იმისა, რომ ბანკი უკრაინაში შეჭრის გამო აშშ-ის ბლოკირების სანქციების ქვეშ იმყოფებოდა.

თუმცა, ირანის სანქციების სიაში მოხვედრა საერთაშორისო ბაზარზე გაცილებით „მასშტაბურია“ — აშშ-ის ფინანსთა სამინისტრო ელის, რომ მეორადი სანქციების შიშით ჩინური ბანკები „ვითიბისთან“ ურთიერთობების გაწყვეტას დაიწყებენ.

ცნობისთვის, რუსეთის სახელმწიფოს მიერ კონტროლირებად „ვითიბი ბანკს“ შეერთებულმა შტატებმა პირველი შეზღუდვები ჯერ კიდევ 2014 წელს, ყირიმის ანექსიის შემდეგ დაუწესა, ხოლო 2022 წელს, უკრაინაში სრულმასშტაბიანი ომის დაწყებისას, მას სრული საბანკო ბლოკირება გამოუცხადა.