რამზან კადიროვმა ჩეჩნეთის რესპუბლიკის მეთაურის არჩევნებში ხმების 99,85% მოიპოვა

რუსეთის ცენტრალური საარჩევნო კომისიის ოფიციალური მონაცემებით, რამზან კადიროვმა ხმების 99,85%-ით გაიმარჯვა ჩეჩნეთის რესპუბლიკის მეთაურის არჩევნებში, რომელიც რუსეთის სახელმწიფო დუმის არჩევნებთან ერთად ჩატარდა.

არჩევნების დასრულებიდან მეორე დღეს, 21 სექტემბერს გამოქვეყნებული ოფიციალური შედეგებით, პარტია „ერთიანი რუსეთის“ კანდიდატის, რამზან კადიროვის კონკურენტებმა — „სამართლიანი რუსეთისა“ და კომუნისტური პარტიის კანდიდატებმა, ისმაილ დენილხანოვმა და ხალიდ ნაკაევმა — თითოეულმა მხოლოდ 0,05-0,05% მიიღეს.

აღსანიშნავია, რომ არცერთ მათგანს საარჩევნო კამპანია ფაქტობრივად არ ჰქონია. თავად კადიროვმა, რომელიც ცნობილია რეპრესიებითა და სისასტიკით, საარჩევნო კამპანიის დროს განსხვავებულად მოაზროვნეთა წინააღმდეგ ბრძოლის გაძლიერება მოითხოვა. უფლებადამცველების ცნობით, ჩეჩნეთში ძალოვან უწყებებს სახლებიდან მიჰყავთ ის პირები, ვინც „არაკეთილსაიმედოდ“ არიან მიჩნეული.