რუტე: ჩვენ [რუსეთზე] უფრო ძლიერები ვართ, მათ ეს იციან

NATO-ს გენერალურმა მდივანმა მარკ რუტემ მოკავშირეებს მოუწოდა, შეინარჩუნონ სიმშვიდე და განაგრძონ უკრაინის მხარდაჭერა.

მისი თქმით, რუსეთის მცდელობები, ძირი გამოუთხაროს ალიანსის მიერ კიევის მხარდაჭერას, ვერ ხერხდება, მიუხედავად NATO-ს წინააღმდეგ განხორციელებული დივერსიებისა და დრონებთან დაკავშირებული ინციდენტების მზარდი რაოდენობისა.

მარკ რუტემ ლიეტუვის პრემიერ-მინისტრთან ერთად გამართულ პრესკონფერენციაზე აღნიშნა, რომ NATO-ს ჰიბრიდულ თავდასხმებზე რეაგირებისთვის თავისი ვარიანტები აქვს.

"NATO-ს რეაგირების ყველა ვარიანტი აქვს, ზოგჯერ ხილული, ზოგჯერ კი არა. ჩვენ [რუსეთზე] უფრო ძლიერები ვართ და მათ ეს იციან.

რუსეთი ცდილობს ჩვენი სიმტკიცე შეასუსტოს და ჩვენი მხრიდან უკრაინის მხარდაჭერა დაასრულოს, თუმცა რუსეთი წარმატებას ვერ აღწევს. ის წარმატებას ვერ აღწევს უკრაინაში ბრძოლის ველზე და ასევე, ჩვენი ერთიანობისთვის ძირის გამოთხრას ვერ ახერხებს", - თქვა რუტემ.

მისი თქმით, ასევე მნიშვნელოვანია, როდესაც არსებული მტკიცებულებები ამის საშუალებას იძლევა, ასეთი ინციდენტების რუსეთისთვის საჯაროდ მიწერა, როგორც ეს დღეს ესტონეთმა გააკეთა.

ცნობისთვის, ესტონეთის საგარეო საქმეთა მინისტრის, მარგუს ცაჰკნას განცხადებით, თავდაცვის კომპანია Milrem Robotics-ის ობიექტზე ხანძრის გაჩენა რუსეთის სპეცსამსახურების დაკვეთით განხორციელებული დივერსიული აქტი იყო.

ცაჰკნა აღნიშნავს, რომ ესტონეთის შიდა უსაფრთხოების სამსახურის მიერ შეგროვებული ინფორმაციის თანახმად, 14-15 აგვისტოს ღამით ობიექტზე ხანძარი განზრახ გააჩინეს.

ცაჰკნას თქმით, ესტონეთის საგარეო უწყებაში რუსეთის საქმეთა დროებითი რწმუნებული დაიბარა.