პუტინი მსოფლიოში არსებულ ვითარებას „ერთობ სახიფათოს“ უწოდებს და ბირთვულ კატასტროფაზე საუბრობს

რუსეთის პრეზიდენტმა, ვლადიმირ პუტინმა მოსკოვის ოლქში გამართულ „ვალდაის“ კლუბის სესიაზე ევროპასა და მსოფლიოში არსებულ ვითარებას „ერთობ სახიფათო“ უწოდა. მან დასავლეთის ქვეყნები კიდევ ერთხელ დაადანაშაულა აგრესიულ ზრახვებში, ისაუბრა სსრკ-ის დაშლის მიზეზებზე და საერთაშორისო პროცესების „ფატალურ შედეგებამდე“ მიყვანის საფრთხეზე გააკეთა გაფრთხილება.

პუტინმა აღნიშნა, რომ ცალკეული ქვეყნების არსენალში არსებობს იარაღი, „რომელსაც ყოველივე სულიერის განადგურება შეუძლია“. მან ეს შეიარაღება შეადარა თეატრის სცენაზე დაკიდებულ თოფს, რომელიც სპექტაკლის დროს აუცილებლად გავარდება:

„შეგვიძლია თუ არა დარწმუნებული ვიყოთ, რომ ასეთ იარაღს არ გამოიყენებენ?“ — დასვა რიტორიკული შეკითხვა პუტინმა. მან დასძინა, რომ რუსეთი, შესაძლოა, იძულებული გახდეს უკიდურეს ზომებს მიმართოს, თუმცა იქვე აღნიშნა, რომ ყველაფერი უნდა გაკეთდეს, რათა ეს „თოფი არ გავარდეს“.

რუსეთის პრეზიდენტმა ხაზი გაუსვა სახიფათო მომენტის გადალახვის აუცილებლობას: „თუ ჩვენ სიცოცხლე გვინდა — სიცოცხლე კი ყველას სურს — მოდით, ვიცხოვროთ მეგობრულად“. მისი თქმით, მოვლენების უარყოფითი სცენარით განვითარების შემთხვევაში, არც სასკოლო სახელმძღვანელოები იარსებებს და არც ის, ვინც ამ სახელმძღვანელოებით ისწავლის.

პუტინის განცხადებით, ომები მომავალშიც იარსებებს, თუმცა ისინი ჰუმანურად უნდა წარიმართოს. მან მოუწოდა საერთაშორისო საზოგადოებას საბრძოლო მოქმედებების წარმოების შესახებ ახალი კონვენციის შემუშავებისკენ, განსაკუთრებით ხელოვნური ინტელექტის (AI) განვითარების ფონზე.

მან გაიხსენა 1983 წლის შემთხვევა, როდესაც საბჭოთა ოფიცერმა სტანისლავ პეტროვმა, პროტოკოლის მიუხედავად, არ გასცა ბრძანება საპასუხო ბირთვული დარტყმის შესახებ, და აღნიშნა, რომ ხელოვნური ინტელექტი ასეთ სიტუაციაში, შესაძლოა, სულ სხვაგვარად მოქცეულიყო.

რუსეთის საგარეო საქმეთა სამინისტროს მიერ ნატოს მისამართით გაკეთებული ბირთვული მუქარის კომენტირებისას (კალინინგრადის ოლქის შესაძლო ბლოკადის საპასუხოდ), პუტინმა განაცხადა:

„ეს არ არის დაშინება. ეს არის პასუხი ჩვენი დაშინების მცდელობებზე... თუ საქმე მივა რუსეთის ფედერაციაზე პირდაპირ თავდასხმამდე, დღის წესრიგში გარდაუვლად დადგება ყველა საშუალების გამოყენების საკითხი“.

მან დასძინა, რომ რადგან რუსეთს ნაკლები სამხედრო ძალა აქვს, ვიდრე ევროპას, ომის შემთხვევაში მოსკოვი თავის „კონკურენტულ უპირატესობას“ გამოიყენებს, თუმცა ამავდროულად აღნიშნა, რომ რუსეთი „არავის ემუქრება“.