აშშ-მა „ლუკოილის“ საერთაშორისო ავტოგასამართი სადგურების ოპერაციები 2027 წლამდე დაუშვა

აშშ-მა „ლუკოილის“ საერთაშორისო სტრუქტურასთან დაკავშირებული გარკვეული ოპერაციები 2027 წლის 24 აპრილამდე დაუშვა. შესაბამისი ზოგადი ლიცენზია ეხება რუსეთის ფარგლებს გარეთ მდებარე ავტოგასამართი სადგურების საქმიანობის გაგრძელებისთვის აუცილებელ ტრანზაქციებს.

დოკუმენტის თანახმად, ნებართვა ვრცელდება Lukoil International GmbH-სა და იმ კომპანიებზე, რომლებშიც მას პირდაპირ ან არაპირდაპირ 50% ან მეტი წილი ეკუთვნის. მათ შორის არიან Lukoil North America LLC და Lukoil Americas Corporation.

ლიცენზიის ფარგლებში ნებადართულია ავტოგასამართი სადგურების ფუნქციონირებისთვის საჭირო საქონლისა და მომსახურების შეძენა, ობიექტების მოვლა-პატრონობა, მათი ოპერირება და საქმიანობის შეწყვეტასთან დაკავშირებული აუცილებელი ოპერაციები.

გარდა ამისა, დოკუმენტი ითვალისწინებს აღნიშნული კომპანიების დაბლოკილი ანგარიშების გამოყენების შესაძლებლობასაც იმ ტრანზაქციებისთვის, რომლებიც ლიცენზიით არის დაშვებული.

ამასთან, შეზღუდვები კვლავ ძალაში რჩება. ლიცენზია არ იძლევა ყველა სანქციური ოპერაციის განხორციელების უფლებას. მათ შორის, ნებართვა არ ვრცელდება აშშ-ის შესაბამისი სანქციური დირექტივებით აკრძალულ ტრანზაქციებზე, რუსეთის ცენტრალურ ბანკთან, ეროვნული კეთილდღეობის ფონდსა და ფინანსთა სამინისტროსთან დაკავშირებულ ოპერაციებზე, ასევე სხვა სანქცირებულ პირებთან ტრანზაქციებზე, თუ ისინი ცალკე არ არის ავტორიზებული.

დოკუმენტის მიხედვით, ასევე აკრძალულია თანხების გადარიცხვა რუსეთის ფედერაციაში მდებარე ნებისმიერი პირისთვის ან ანგარიშზე.

ლიცენზია ძალაშია 2027 წლის 24 აპრილის 00:01 საათამდე, აშშ-ის აღმოსავლეთის ზაფხულის დროით. მისი მოქმედება გულისხმობს კონკრეტული საქმიანობისთვის აუცილებელი ოპერაციების დაშვებას და არა „ლუკოილის“ მიმართ დაწესებული სანქციების სრულ გაუქმებას.