ევროკავშირი -„ხელისუფლებას აღარ ვაფინანსებთ, მოსახლეობის მხარდაჭერას კი ვაგრძელებთ“

ევროკავშირი 2026 წელს საქართველოში ახალი პროექტების განსახორციელებლად 38 მილიონი ევროს ოდენობის დაფინანსებას გამოყოფს. საქართველოში ევროკავშირის წარმომადგენლობის განცხადებით, ქვეყანაში დემოკრატიული პროცესების უკუსვლის გამო, ევროკავშირი საქართველოს ხელისუფლებას აღარ აფინანსებს, თუმცა მოსახლეობის მხარდაჭერას განაგრძობს.

როგორც ევროკავშირის წარმომადგენლობა სოციალურ ქსელში წერს, ახალი დაფინანსების მიზანია საქართველოს მასშტაბით ოჯახებისა და ადგილობრივი თემებისთვის დადებითი ცვლილებების ხელშეწყობა.

დაფინანსება რამდენიმე მიმართულებას მოიცავს. მათ შორისაა პატარა ქალაქებსა და დაბებში ეკონომიკური შესაძლებლობების შექმნა, შრომის ბაზრის მოთხოვნების შესაბამისი უნარების განვითარება და სოფლებისა და რეგიონების სოციალურ-ეკონომიკური გაძლიერება, მათ შორის ქალების ეკონომიკურ საქმიანობაში ჩართულობის ხელშეწყობა.

ევროკავშირის მხარდაჭერა ასევე ითვალისწინებს ბაზრებზე წვდომის გაუმჯობესებასა და სურსათის ხარისხის ამაღლებას, ქალებისა და გოგონების მიმართ ძალადობის წინააღმდეგ ბრძოლას, უსაფრთხო და ორგანიზებული მიგრაციის ხელშეწყობას, კლიმატის ცვლილებასთან ადაპტაციასა და სტიქიური უბედურებებისთვის მზადყოფნის გაუმჯობესებას. დაფინანსების ერთ-ერთი მიმართულება აფხაზეთში მცხოვრები თემების მხარდაჭერის გაგრძელებაც იქნება.

ევროკავშირის წარმომადგენლობა განცხადებაში აღნიშნავს, რომ ორგანიზაცია საქართველოს 30 წელზე მეტია მხარს უჭერს. მათი ინფორმაციით, 1992 წლიდან ევროკავშირმა საქართველოში განვითარების ხელშეწყობისთვის 2 მილიარდ ევროზე მეტი ინვესტიცია განახორციელა.

დაფინანსება სხვადასხვა სფეროს მოიცავდა, მათ შორის სოფლის მეურნეობის განვითარებას, რეგიონებში მცირე ბიზნესის მხარდაჭერას, ჰაერის ხარისხის გაუმჯობესებასა და აღმოსავლეთ-დასავლეთის ჩქაროსნული ავტომაგისტრალის მოდერნიზაციის ხელშეწყობას.

„საქართველოში დემოკრატიული პროცესების უკუსვლის გამო, ევროკავშირი აღარ აფინანსებს საქართველოს ხელისუფლებას, თუმცა განვაგრძობთ საქართველოს მოსახლეობის მხარდაჭერას“, — ნათქვამია საქართველოში ევროკავშირის წარმომადგენლობის განცხადებაში.

ევროკავშირის წარმომადგენლობის განცხადებით, 2026 წელს ახალი პროექტებისთვის გამოყოფილი 38 მილიონი ევრო ორგანიზაციის მიერ საქართველოს მოსახლეობის მხარდაჭერის გაგრძელების ერთ-ერთი ნაწილია.