პლენუმმა მოწმის სახით მიხეილ სააკაშვილისა და ლევან ხაბეიშვილის დაბარებაზე უარი თქვა

ბათუმის საკონსტიტუციო სასამართლოში პროდასავლური ოპოზიციური პარტიების აკრძალვის სარჩელის განხილვისას ნაციონალურმა მოძრაობამ მოწმის სახით მიხეილ სააკაშვილისა და ლევან ხაბეიშვილის დაბარების შუამდგომლობა დააყენა.

მოსამართლეთა პლენუმმა ადგილზევე მოითათბირა და განაცხადა, რომ ამ შუამდგომლობას არ აკმაყოფილებს.

საკონსტიტუციო სასამართლოს თავმჯდომარემ რევაზ ნადარაიამ განმარტა, რომ "აღნიშნული შუამდგომლობა არ უნდა დაკმაყოფილდეს გამომდინარე იქიდან, რომ ვერ დასაბუთდა, რა გარემოებებს დაადასტურებენ მოწმეები მათი სასამართლოში წარმოდგენის შემთხვევაში".

მანამდე, მოსამართლეებმა პლენუმის აცილების შუამდგომლობა არ დააკმაყოფილეს.

სხდომაზე ერთიანმა ნაციონალურმა მოძრაობამ მოსამართლეთა კოლეგიის სრული შემადგენლობის აცილების შუამდგომლობა დააყენა, ლელო - ძლიერმა საქართველომ კი - 3 მოსამართლის.

ბათუმის საკონსტიტუციო სასამართლოში პროდასავლური ოპოზიციური პარტიების აკრძალვის პროცესი დაიწყო.

საუბარია შემდეგ პარტიებზე: ერთიანობა - ნაციონალური მოძრაობა, კოალიცია ცვლილებისთვის, ლელო - ძლიერი საქართველო, ფედერალისტები და გახარია - საქართველოსთვის.

საქმეს საკონსტიტუციო სასამართლოს შვიდი მოსამართლის შემადგენლობით პლენუმი იხილავს.

საკონსტიტუციო სასამართლოში წარდგენილ სარჩელს ქართული ოცნების პარლამენტის 88 დეპუტატი წევრი აწერს ხელს.

88 დეპუტატი საკონსტიტუციო სასამართლოსგან მოითხოვს:

ხუთი პოლიტიკური პარტიის საქმიანობის არაკონსტიტუციურად ცნობას; ამ პარტიების აკრძალვას; მათი რეგისტრაციის გაუქმებას.

მოსარჩელეთა მტკიცებით, აღნიშნული პარტიების საქმიანობის მიზანია საქართველოს კონსტიტუციური წყობილების დამხობა ან ძალადობით შეცვლა, ქვეყნის დამოუკიდებლობის ხელყოფა და ტერიტორიული მთლიანობის დარღვევა.

კონსტიტუციურ სარჩელს თან ერთვის ქართული ოცნების პარლამენტში შექმნილი დროებით საგამოძიებო კომისიის დასკვნა.