„სამეფო კარის თამაშების“ ვარსკვლავი ნიკოლაი კოსტერ-ვალდაუ უკრაინაში იმყოფება
პოპულარული სერიალის, „სამეფო კარის თამაშების“ მსახიობი ნიკოლაი კოსტერ-ვალდაუ უკრაინას სტუმრობს. დანიელმა მსახიობმა, რომელიც მაყურებელმა ჯეიმი ლანისტერის როლით გაიცნო, ქვეყანაში ვიზიტისას რუსეთის უწყვეტი თავდასხმების შედეგები საკუთარი თვალით იხილა.
კოსტერ-ვალდაუ გაეროს განვითარების პროგრამის (UNDP) კეთილი ნების ელჩია. კიევში ვიზიტის ფარგლებში ის უკრაინელ მსახიობსა და ომის ვეტერანს, ვოლოდიმირ ტუკას, შეხვდა და მის ერთპიროვნულ სპექტაკლს დაესწრო. წარმოდგენა მსახიობის გამოცდილებას ასახავს — რუსეთის დროებითი ოკუპაციის პერიოდსა და უკრაინის თავდაცვის ძალებში მსახურებას.
ვიზიტის დროს დანიელ მსახიობს უკრაინელებისთვის ყოველდღიური რეალობის გაზიარებაც მოუწია. რუსეთის სარაკეტო და დრონებით თავდასხმების საფრთხის გამო, მას თავშესაფრის საძიებლად კიევის მეტროს მიწისქვეშა სადგურში ჩასვლა დასჭირდა.
საჰაერო განგაშის დროს თავშესაფარში გადასვლა მილიონობით უკრაინელისთვის ყოველდღიური ცხოვრების ნაწილია. რუსეთის თავდასხმების გამო ქვეყნის მოსახლეობას მუდმივად უწევს სამუშაოს, სწავლისა და ყოველდღიური საქმიანობის შეწყვეტა საკუთარი უსაფრთხოების დასაცავად.
ფორმულა
წყარო: formulanews.ge