ნატო თურქეთში ირანიდან მომდინარე საფრთხის ფონზე Patriot-ის კიდევ ერთ ჰაერსაწინააღმდეგო სისტემას განათავსებს

ნატომ მიიღო გადაწყვეტილება თურქეთში ირანიდან მომდინარე საფრთხის გამო Patriot-ის ტიპის კიდევ ერთი ჰაერსაწინააღმდეგო სისტემის განთავსების შესახებ. ინფორმაციას თურქეთის თავდაცვის სამინისტრო ავრცელებს.

ჰაერსაწინააღმდეგო სისტემა ადანას პროვინციაში განთავსდება, სადაც ინჯირლიკის საავიაციო ბაზა მდებარეობს. იქ აშშ-ისა და ნატოს სხვა წევრი ქვეყნების სამხედრო პერსონალი მსახურობს.

„ჩვენი საჰაერო სივრცისა და მოქალაქეების უსაფრთხოების უზრუნველყოფის მიზნით, ეროვნულ ზომებთან ერთად ადანაში განთავსებული Patriot-ის სისტემას დაემატება კიდევ ერთი სისტემა, რომელიც რამშტაინის (გერმანია) გაერთიანებულმა საჰაერო სარდლობამ გამოყო“, - აღნიშნულია თურქეთის თავდაცვის სამინისტროს მიერ გავრცელებულ ინფორმაციაში.

აღსანიშნავია, რომ ირანში ომის დაწყებიდან დღემდე თურქეთის საჰაერო სივრცეში ირანიდან გაშვებული ბალისტიკური რაკეტების შეჭრის სამი შემთხვევა დაფიქსირდა.