მოლდოვის პარლამენტმა ქვეყნის დსთ-დან გასვლას დაუჭირა მხარი
მოლდოვის პარლამენტმა ქვეყნის დამოუკიდებელ სახელმწიფოთა თანამეგობრობიდან (დსთ) გასვლა დაამტკიცა. კანონპროექტი თანამეგობრობაში ქვეყნის წევრობის შესახებ ძირითადი ხელშეკრულებების გაუქმების თაობაზე მეორე, საბოლოო მოსმენით მიიღეს. გადაწყვეტილებას მხარი პარლამენტის 101 დეპუტატიდან 60-მა დაუჭირა.
კანონპროექტების წინააღმდეგ ხმა მისცეს კომუნისტური და სოციალისტური პარტიების დეპუტატებმა. კომუნისტების ლიდერმა, ვლადიმერ ვორონინმა განაცხადა, რომ მოლდოვის დსთ-დან გასვლის გადაწყვეტილება არის „ტრაგედია ქვეყნისთვის, მისი ეკონომიკისთვის“ და რომ მათ, ვინც ამ გადაწყვეტილებას მხარი დაუჭირა, „წარმოდგენაც კი არ აქვთ, რა მოჰყვება ამას“.
მოლდოვამ დსთ-დან გასვლის პროცესი იანვარში დაიწყო. ეს გადაწყვეტილება უკვე მოიწონა ქვეყნის მთავრობამ. ახლა კანონპროექტი ხელმოსაწერად პრეზიდენტ მაია სანდუს გადაეცემა. მოლდოვის საგარეო საქმეთა მინისტრმა მიხაი პოპშოიმ მანამდე დააზუსტა, რომ კიშინიოვი არ აპირებს უარი თქვას დსთ-სთან დაკავშირებულ ყველა შეთანხმებაზე: ის ხელშეკრულებები, რომლებსაც ეკონომიკური სარგებელი მოაქვთ ან პრაქტიკული მნიშვნელობა აქვთ მოქალაქეებისთვის, ძალაში დარჩება, თუ ისინი ქვეყნის ევროპულ კურსს არ ეწინააღმდეგება.
იმედი
წყარო: imedinews.ge