მაკრონი აცხადებს, რომ მან აშშ-სა და ირანს მოლაპარაკებების განახლებისკენ მოუწოდა

საფრანგეთის პრეზიდენტმა, ემანუელ მაკრონმა განაცხადა, რომ ორშაბათს ესაუბრა თავის ამერიკელ და ირანელ კოლეგებს - დონალდ ტრამპსა და მასუდ პეზეშკიანს. მან მხარეებს მოუწოდა მოლაპარაკებების განახლებისკენ მას შემდეგ, რაც პირველი რაუნდი შეთანხმების გარეშე დასრულდა.

პლატფორმა X-ზე გამოქვეყნებულ პოსტში მაკრონმა მხარეებს მოუწოდა გააგრძელონ შაბათ-კვირას ისლამაბადში „შეწყვეტილი“ მოლაპარაკებები, რათა „განიმარტოს გაუგებრობები და თავიდან იქნას აცილებული ესკალაციის ახალი ფაზები“.

„განსაკუთრებით მნიშვნელოვანია, რომ ცეცხლის შეწყვეტის რეჟიმი ყველამ მკაცრად დაიცვას და მან მოიცვას ლიბანიც“, - დაწერა მაკრონმა. ამერიკის შეერთებული შტატები კი ამტკიცებს, რომ ლიბანის კონფლიქტი ირანთან მოლაპარაკებებისგან დამოუკიდებელი საკითხია.

„ასევე თანაბრად მნიშვნელოვანია, რომ ჰორმუზის სრუტე რაც შეიძლება მალე გაიხსნას უპირობოდ, ყოველგვარი კონტროლისა თუ გადასახადების გარეშე“, - განაცხადა მაკრონმა. მისი თქმით, ეს შესაძლებლობას მისცემს მხარეებს, სწრაფად განაახლონ მოლაპარაკებები.