დეკანოზი ანთიმოზ ჩაგელიშვილი პატრიარქზე: ძალიან მძიმე წლებში განვლო თავისი ცხოვრება და მოღვაწეობა, მაგრამ არაფერს შეუშინდა. სულიერად ამხნევებდა როგორც სასულიერო პირებს, ასევე საერო ადამიანებს

საქართველოს კათოლიკოს-პატრიარქის სულის მოსახსენებელი პანაშვიდი გადაიხადეს ყვარელსა და თელავში.

ნეკრესის სამონასტრო კომპლექსში მდებარე ტაძარში ღვთისმსახურებას მონასტრის წინამძღვარი უძღვებოდა. პანაშვიდი უწყვეტი გალობით წარიმართა და მას მხოლოდ მღვდელმსახურები და ბერ-მონაზვნები ესწრებოდნენ.

პატრიარქის სულის მოსახსენებელი პანაშვიდი გადაიხადეს თელავის ღვთისმშობლის მიძინების სახელობის ტაძარშიც.

დეკანოზ ანთიმოზ ჩაგელიშვილის განცხადებით, უწმინდესი პატრიარქი დიდი სულიერი მამა და დიდი მოღვაწე იყო.

„საქართველოს, თითქმის ასეთი კათოლიკოს-პატრიარქი არ ჰყოლია. მან ძალიან მძიმე წლებში განვლო თავისი ცხოვრება და მოღვაწეობა, მაგრამ არაფერს შეუშინდა. სულიერად ამხნევებდა როგორც სასულიერო პირებს, ასევე საერო ადამიანებს“, - განაცხადა დეკანოზმა ანთიმოზმა.