კადეტებმა თბილისის კლასიკურ გიმნაზიაში საინფორმაციო შეხვედრა გამართეს
კადეტთა სამხედრო ლიცეუმის წარმომადგენლები, საინფორმაციო შეხვედრის ფარგლებში თბილისის კლასიკურ გიმნაზიას ესტუმრნენ. მე-8 და მე-9 კლასების მოსწავლეებთან გამართულ შეხვედრაზე მათ დეტალურად ისაუბრეს ლიცეუმში ჩარიცხვის პირობებზე, სასწავლო პროცესზე, დისციპლინურ გარემოსა და სამოტივაციო პროგრამებზე, რომლებიც კადეტებს პიროვნულ განვითარებაში ეხმარება.
აღინიშნა, რომ ლიცეუმისადმი მოსწავლეთა მზარდი მოთხოვნის გათვალისწინებით, ქუთაისის პარალელურად, უახლოეს მომავალში კადეტთა სკოლა აღმოსავლეთ საქართველოში კერძოდ, კრწანისშიც გაიხსნება. შეხვედრა ინტერაქტიურ რეჟიმში წარიმართა. მოსწავლეებმა მათთვის საინტერესო კითხვებზე მიიღეს პასუხები.
კადეტთა სამხედრო ლიცეუმის საინფორმაციო შეხვედრები საქართველოს მასშტაბით, საჯარო სკოლებში აქტიურ რეჟიმში მიმდინარეობს. კადეტთა სამხედრო ლიცეუმი პანსიონის ტიპის სასწავლებელია და შესაბამისად, კადეტის სადღეღამისო დასწრება სავალდებულოა. ლიცეუმში სწავლება და საცხოვრებელი პირობები, საქართველოს თავდაცვის სამინისტროს მიერ სრულად ფინანსდება.
იმედი
წყარო: imedinews.ge