აბასთუმანში მიმდინარე და დაგეგმილი ინფრასტრუქტურული პროექტები რევაზ სოხაძემ ადგილზე განიხილა
ინფრასტრუქტურის სამინისტრო აგრძელებს მასშტაბურ სამუშაოებს აბასთუმანში. ვიწყებთ კურორტის განვითარების ახალ ეტაპს, რომელიც მოიცავს დარჩენილი შენობა-ნაგებობების რეაბილიტაციასაც. შენობების უმრავლესობა ისტორიული ძეგლია და მათი სწორად აღდგენა, კულტურული მნიშვნელობის შენარჩუნებით, განსაკუთრებულად მნიშვნელოვანია, -განაცხადა ინფრასტრუქტურის მინისტრმა, რევაზ სოხაძემ აბასთუმანში.
რევაზ სოხაძე, მუნიციპალური განვითარების ფონდის, საავტომობილო გზების დეპარტამენტის, ადგილობრივი ხელისუფლების, კონტრაქტორი კომპანიებისა და არქიტექტურული ჯგუფის წარმომადგენლებთან ერთად, აბასთუმანში მიმდინარე ინფრასტრუქტურულ პროექტებს გაეცნო და დაგეგმილი სამუშაოების დეტალები განიხილა.
სამუშაო შეხვედრაზე იმსჯელეს კურორტის ინფრასტრუქტურის მასშტაბური რეაბილიტაციის პროექტირება-მშენებლობის ფარგლებში დაგეგმილ სამუშაოებზე, განხორციელების ეტაპებზე, არსებულ გამოწვევებსა და ხარისხის კონტროლის საკითხებზე. ასევე განიხილეს კურორტის მოვლა-პატრონობისთვის საჭირო ღონისძიებები და აბასთუმნის ეკოლოგიური, ისტორიული და ტურისტული გარემოს შენარჩუნების მნიშვნელობა.
ახალი ხელშეკრულებით, აბასთუმანში ინფრასტრუქტურის მასშტაბური რეაბილიტაციის პროექტირება-მშენებლობა იწყება. პროექტი ითვალისწინებს ისტორიული და კულტურული მნიშვნელობის მქონე შენობების აღდგენას, ტურისტული და საზოგადოებრივი სივრცეების კეთილმოწყობას, ქუჩებისა და გზების განახლებას, ასევე ნაპირსამაგრი და სახიდე ინფრასტრუქტურის მოწყობას.
ინფრასტრუქტურის სამინისტროს მიერ აბასთუმანში გასულ წლებში არაერთი მნიშვნელოვანი პროექტი განხორციელდა. ამ ეტაპზე მიმდინარეობს ბაღდათი-აბასთუმნის გზის სრული რეაბილიტაცია და აბასთუმნის შემოვლითი გზის მშენებლობა, რომლის ფარგლებში უკვე აშენებულია ხიდები და გვირაბი. პარალელურად მიმდინარეობს ქუთაისი-ბაღდათი-აბასთუმანი-ბენარას გზის მონაკვეთის რეაბილიტაცია, ასათიანის ქუჩის განახლება და იგეგმება საცხოვრებელი სახლების ფასადების რეაბილიტაციაც.
მინისტრმა საგზაო ინფრასტრუქტურის პროექტებზე საუბრისას აღნიშნა, რომ კონტრაქტორ კომპანიებთან სამუშაოების ვადებსა და ხარისხთან დაკავშირებით მკაცრი კომუნიკაცია გაიმართა.
