აჭარის მთავრობის თავმჯდომარე შუახევის მუნიციპალიტეტში ინფრასტრუქტურულ პროექტებს გაეცნო და სოფელ ხიჭაურსა და გომარდულში მიმდინარე სამუშაოები დაათვალიერა

აჭარის მთავრობის თავმჯდომარე ზურაბ პატარაძე შუახევის მუნიციპალიტეტში ინფრასტრუქტურულ პროექტებს გაეცნო და სოფელ ხიჭაურსა და გომარდულში მიმდინარე სამუშაოები დაათვალიერა, - ინფორმაციას აჭარის მთავრობა ავრცელებს.

მთავრობის თავმჯდომარის განცხადებით, მაღალმთიან აჭარაში განხორციელებული პროექტები მნიშვნელოვნად გააუმჯობესებს როგორც მოსახლეობის ცხოვრების პირობებს, ისე რეგიონის ტურისტულ მიმზიდველობას.

„დღეს მაღალმთიან აჭარაში მნიშვნელოვანი ინფრასტრუქტურული პროექტები დავათვალიერეთ. ხიჭაურში ადმინისტრაციული ცენტრის კეთილმოწყობა მიმდინარეობს, რაც საგზაო და მუნიციპალური ინფრასტრუქტურის მოწესრიგებას ითვალისწინებს. ასევე ვიმყოფებოდით გომარდულში, რომელსაც დიდი ტურისტული და სამთო-სათხილამურო პოტენციალი აქვს. აქ შენდება ახალი კოტეჯები, ვითარდება ტურისტული ინფრასტრუქტურა და იზრდება კერძო სექტორის ინტერესი. ახალი პროექტები მიმდინარეობს ხიჭაურის, ჭვანისა და გომის მიმართულებებითაც, მათ შორის დაწყებულია 6.5 კილომეტრი გზის მოწყობა“, - განაცხადა ზურაბ პატარაძემ.

სოფელ ხიჭაურში აქტიურად მიმდინარეობს ადმინისტრაციული ცენტრის კეთილმოწყობა. პროექტი მოიცავს მრავალბინიანი საცხოვრებელი სახლების ეზოებისა და სკვერის რეაბილიტაციას, ასფალტ-ბეტონის საფარის, ფერდსამაგრი კედლების, დეკორატიული განათებისა და მიწისქვეშა კომუნიკაციების მოწყობას.

გომარდულში დასრულებულია თანამედროვე სტანდარტების ადმინისტრაციული შენობის მშენებლობა. შენობაში განთავსდება რწმუნებულის ოფისი, სამედიცინო პუნქტი და მრავალფუნქციური დარბაზი. პროექტი ითვალისწინებს შშმ პირებისთვის ადაპტირებულ გარემოს, ასევე მიმდებარე ტერიტორიის კეთილმოწყობას - მოეწყობა მოსასვენებელი და საბავშვო სივრცეები, ფანჩატურები, საფეხმავლო ბილიკები, საკოცონე სივრცე, გარე განათება და გამწვანება.

შუახევის მუნიციპალიტეტში მიმდინარე ინფრასტრუქტურულ პროექტებს მთავრობის თავმჯდომარესთან ერთად აჭარის ფინანსთა და ეკონომიკის მინისტრი ედნარ ნატარიძე, საქართველოს პარლამენტის წევრი ანზორ ბოლქვაძე, აჭარის უმაღლესი საბჭოს წევრი ფრიდონ ფუტკარაძე, შუახევის მერი ომარ ტაკიძე, აჭარის საავტომობილო გზების დეპარტამენტის ხელმძღვანელი ზაზა შავაძე და ადგილობრივი თვითმმართველობის წარმომადგენლები გაეცნენ.