აჭარის მთავრობის თავმჯდომარე ზურაბ პატარაძე, ახალი სასწავლო წლის დაწყებამდე, აჭარის განათლების სამინისტროს სხვადასხვა პროექტსა და კონკურსში გამარჯვებულ მასწავლებლებს შეხვდა

აჭარის მთავრობის თავმჯდომარე ზურაბ პატარაძე, უმაღლესი საბჭოს თავმჯდომარე ცოტნე ანანიძესა და აჭარის განათლებისა და სპორტის მინისტრთან, მაია ხაჯიშვილთან ერთად, სხვადასხვა პროექტსა და კონკურსში გამარჯვებულ მასწავლებლებს შეხვდა.ზურაბ პატარაძემ პედაგოგებს მიღწეული წარმატება მიულოცა და აღნიშნა, რომ ახალი სასწავლო წლის დაწყებამდე ასეთი ღონისძიების ორგანიზება, მასწავლებლის ღვაწლის დაფასების და მოტივაციის ამაღლების მკაფიო გზავნილია, რადგან განათლების ხარისხის გაუმჯობესებასა და მოსწავლეებისთვის უკეთესი შესაძლებლობების შექმნაში, მასწავლებლების როლი განსაკუთრებულია.

„სიმბოლურია, რომ ახალი სასწავლო წლის დაწყების წინ მასწავლებლებს შევხვდით. მათი ჩართულობა და როლი განათლების ხარისხის გაუმჯობესებისა და ქვეყნის განვითარებისთვის უმნიშვნელოვანესია. ჩვენი ქვეყნის სიძლიერე განათლებულ და წარმატებულ ახალგაზრდებშია, მათი აღზრდის პროცესში კი, პედაგოგების ყოველდღიურ შრომას უდიდესი მნიშვნელობა აქვს. ჩვენი მხრივ, ყველაფერს ვაკეთებთ იმისთვის, რომ მოწესრიგებული იყოს საგანმანათლებლო ინფრასტრუქტურა და შეიქმნას ღირსეული პირობები როგორც ბავშვებისთვის, ისე მასწავლებლებისთვის“ - განაცხადა ზურაბ პატარაძემ.

პროგრამის „პროექტი ჩემს გაკვეთილზე“ ფარგლებში გამარჯვებულ 50 მასწავლებელს, ყოველთვიურად 500-ლარიანი სახელფასო დანამატი, ასევე, საგანმანათლებლო რესურსების შესაძენად 1000-ლარიანი ფინანსური მხარდაჭერა გადაეცემათ. განათლების სამინისტროს კიდევ ერთი პროექტის ფარგლებში, 100 გამარჯვებული პედაგოგი გამოვლინდა, რომლებიც 2026–2027 სასწავლო წლის განმავლობაში, ყოველთვიურად 250-ლარიან სახელფასო დანამატს მიიღებენ. უცხოეთში სტაჟირების კონკურსის 10 გამარჯვებული პედაგოგი კი, პოლონეთში პროფესიული განვითარების პროგრამაში ჩაერთვება.

ღონისძიებას აჭარის უმაღლესი საბჭოს წევრები, მუნიციპალიტეტების ხელმძღვანელი პირები, ბათუმის მერიისა და საკრებულოს წარმომადგენლები და რესურსცენტრების ხელმძღვანელები ესწრებოდნენ.