ადვოკატის ცნობით, იოსებ სიგუამ თანამდებობა ნებაყოფლობით დატოვა
ცენტრალური კრიმინალური პოლიციის ორგანიზებულ დანაშაულთან ბრძოლის მთავარი სამმართველოს უკვე ყოფილმა უფროსმა, ადვოკატის, თეონა გვაზავას ინფორმაციით თანამდებობა საკუთარი გადაწყვეტილებით, გამოძიების მიმდინარეობის გამო დატოვა. უფლებადამცველმა ასევე კომენტარი გააკეთა, სიგუას დაწინაურების შესახებ სპეკულაციებთან დაკავშირებით და მეუღლისა და ზოგიერთი მედიის მიერ გავრცელებულ ამბებს სიცრუე უწოდა. შემაკავებელ ორდერთან და ბრალდებებთან დაკავშირებით სასამართლო უახლოეს პერიოდში იმსჯელებს.
„ვინაიდან საზოგადოებაში არსებობდა გარკვეული ეჭვები, რომ შესაძლოა სამსახურებრივი თანამდებობა გამოყენებულიყო და ხელი შეშლოდა გამოძიების მსვლელობას, საკუთარი ნება-სურვილით დატოვა დაკავებული თანამდებობა. ვფლობთ არაერთ მტკიცებულებას, რომლითაც დასტურდება, რომ დაახლოებით 1 კვირის წინ, „ტვ პირველზე“ გასულ სატელევიზიო სიუჟეტში გაცხადებული პოზიცია, რომელიც მსხვერპლის სტატუსის მქონე სოფიო სიგუამ გააჟღერა, არ შეესაბამება რეალობას. გამოვიყენებთ კანონით გათვალისწინებულ ყველა ბერკეტს, რითაც დადასტურდება იოსებ სიგუას უდანაშაულობა და დავიცავთ მის ღირსებას.
ბოლო რამდენიმე დღის განმავლობაში ვრცელდებოდა არასწორი ინფორმაცია, თითქოსდა იოსებ სიგუას მიმართ განხორციელდა სამსახურებრივი წახალისება და დააწინაურეს. მოხდა სხვადასხვა დეპარტამენტში ცვლილება და როტაცია, რაც არ ითვლება იოსებ სიგუას დაწინაურებად“, - განმარტა ადვოკატმა.
მეუღლე იოსებ სიგუას ძალადობაში ადანაშაულებს. სიგუას ელექტრონული მეთვალყურეობის შესახებ გადაწყვეტილება სასამართლომ ძალაში დატოვა.
იმედი
წყარო: imedinews.ge