ალექსანდრე კარტოზია: გერმანიის ახალი ელჩი ჩამოდის მოკლე ხანში საქართველოში. ცნობილია გენშერის გამონათქვამი: „ელჩი არის საკუთარი ქვეყნის წარმომადგენელი ადგილსამყოფელ ქვეყანაში და ადგილსამყოფელი ქვეყნის ადვოკატი საკუთარ ქვეყანაში“. თუ ამ პრინციპით ვიმოქმედებთ ორივე მხარე ურთიერთობები ჩვენს ქვეყნებს შორის გაუმჯობესდება

მოგეხსენებათ გერმანიის ახალი ელჩი ჩამოდის მოკლე ხანში საქართველოში. მე მას არ ვიცნობ მაგრამ იმედი მაქვს, რომ ისიც ისე იქნება მოწადინებული საქართველო-გერმანიას შორის ურთიერთობები გაუმჯობესდეს და იმ ვითარებას დაუბრუნდეს, რომელიც ჩვენ ისტორიულად გვახასიათებს, როგორც მე, ჩემი მხრიდან ვიქნები ამისთვის მზად, - განაცხადა „ქრონიკასთან“ გერმანიაში საქართველოს საგანგებო და სრულუფლებიანმა ელჩმა ალექსანდრე კარტოზიამ.

მან იმედი გამოთქვა, რომ გერმანია იქნება ერთ-ერთი მთავარი მხარდამჭერი საქართველოს ევროკავშირში გაწევრიანების გზაზე.

„ცნობილია გენშერის გამონათქვამი, რომელიც ყველაზე კარგად განსაზღვრავს ელჩის ფუნქციას: „ელჩი არის საკუთარი ქვეყნის წარმომადგენელი ადგილსამყოფელ ქვეყანაში და ადგილსამყოფელი ქვეყნის ადვოკატი საკუთარ ქვეყანაში“. აი, თუ ამ პრინციპით ვიმოქმედებთ ორივე მხარე, ორივე ელჩი მე ძალიან დიდი იმედი მაქვს და მოლოდინიც გარკვეულწილად, რომ ასეთი იქნება სწორედ გერმანიის ელჩი საქართველოში. ვფიქრობ, რომ ამ საფუძველზე ჩვენს ქვეყნებს შორის ურთიერთობები გაუმჯობესდება. ცხადია საქართველოს ინტერესია ევროპული ოჯახის წევრობა, ეს დღევანდელ საუბარშიც დავადასტურეთ. ამ მხრივ გერმანიის მხარდაჭერა გადამწყვეტია და იმედი მაქვს რომ ამ მიმართულებით სასიკეთო ძვრებს უნდა ველოდოთ“, - განაცხადა ალექსანდრე კარტოზიამ.

ალექსანდრე კარტოზიამ გერმანიის ფედერალურ პრეზიდენტს, ფრანკ-ვალტერ შტაინმაიერს რწმუნებათა სიგელები გადასცა. პარალელურად კი დაახლოებით წლინახევრის შემდეგ, გერმანიის საგარეო საქმეთა სამინისტროს ვებგვერდიდან წაიშალა ის არასწორი მონაცემები, სადაც საქართველოს მოქმედ პრეზიდენტად სალომე ზურაბიშვილი იყო მოხსენიებული.