ალუდა ღუდუშაური „გამჭვირვალობის კანონზე“: ყველა ცდილობს, რომ თავისი გავლენის სფეროები შექმნას, გააძლიეროს, გააფართოოს და ა.შ. ეს არის მსოფლიო პოლიტიკის ნაწილი. მაგრამ არის მეორე საკითხი, როგორი იქცევი შენ - პასუხისმგებლობიანი სახელმწიფო და როგორ ახერხებ ამის დაცვას, პრევენციას და სხვადასხვა ღონისძიებების გატარებას ამის საპასუხოდ

რა თქმა უნდა, ყველა ცდილობს და ამაში ახალი და უჩვეულო არაფერი არ არის, რომ თავისი გავლენის სფეროები შექმნას, შემდეგ გააძლიეროს, განამტკიცოს, გააფართოოს და ა.შ. ეს არ არის ცდუნება, ეს არის მოცემულობა და მსოფლიო პოლიტიკის ნაწილი. მაგრამ არის მეორე საკითხი, როგორი იქცევი შენ - პასუხისმგებლობიანი სახელმწიფო და როგორ ახერხებ ამის დაცვას, პრევენციას და სხვადასხვა ღონისძიებების გატარებას ამის საპასუხოდ, - განაცხადა „დღის ქრონიკასთან“ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველმა მოადგილემ ალუდა ღუდუშაურმა „გამჭვირვალობის კანონზე“ საუბრისას.

მისი თქმით, გარე ჩარევების მაქსიმალური შეზღუდვისთვის, როგორც აშშ, ასევე, ევროპის წამყვანი ქვეყნები ამ მიმართულებით კანონებს ამკაცრებენ.

„მინდა ყველას შევახსენო, რომ აშშ, რომელიც ამ მხრივ ფლაგმანი არის და სხვა დანარჩენი ევროპის ქვეყნები, ცენტრალური ევროპის ნაწილი და წამყვანი ქვეყნების ვხედავთ, რომ არა თუ ამკაცრებენ, არამედ პრაქტიკულად უფრო მეტად ხისტს, რეაგირებაზე ორიენტირებულს და უფრო ქმედითს შემოტანას აპირებს და ქმნიან.

უნდა გვესმოდეს, რომ აშშ, რომელიც არის მსოფლიოში ერთადერთი სახელმწიფო, რომელსაც აქვს ყველა ის რესურსი, რომელიც ძლიერ სახელმწიფოს უნდა ჰქონდეს - უამრავი ბერკეტი, უამრავი საშუალება, ჩვენ ვხედავთ, რომ აშშ საუბრობს სხვადასხვა გარე სახელმწიფოების მიერ ჩარევის მცდელობაზე, ამის პრევენციაზე და ამ საკითხს წინ სწევს. ამასთან, მას აქვს უკვე მიღებული FARA-ს კანონი. ეს ქვეყანა საუბრობს იმაზე, რომ კიდევ უფრო მეტად გაამკაცროს და მოუწოდებს ყველას, რომ დარეგისტრირდნენ და მე მოვუწოდებ ჩვენს ოპონენტებს ჩაიხედონ, წინააღმდეგ შემთხვევაში, ვინც ამ კანონს არღვევს რა ხდება ამ დროს. არ არის საუბარი აქ ადმინისტრაციულ სახდელზე, არის მომეტებული პასუხისმგებლობა და ხშირ შემთხვევაში სისხლის სამართლის პასუხისმგებლობაც“, - განაცხადა ალუდა ღუდუშაურმა.

ამერიკის შეერთებული შტატები უცხოელი აგენტების რეგისტრაციის აქტის (FARA) არეალს ზრდის. ახალი რეგულაციებით, ვიზა გაუუქმდება ყველა უცხოელს, რომლის საქმიანობაც აშშ-ის ეროვნულ ინტერესებსა და საგარეო პოლიტიკას ეწინააღმდეგება. ამასთან, გამჭვირვალობისა და ანგარიშვალდებულების მოთხოვნები იზრდება სოციალურ ქსელებშიც - კერძოდ, ის შეეხება იმ ინფლუენსერებს, რომლებიც უცხოური მთავრობების ან სუბიექტების ინტერესებით მოქმედებენ. აშშ-ის სახელმწიფო დეპარტამენტმა ყველას მოუწოდა, დაემორჩილონ კანონის წესებს, წინააღმდეგ შემთხვევაში კი, სამართლებრივი რეაგირებით დაემუქრა.