ალუდა ღუდუშაური კანდელაკის „კვლევაზე“: ეს არის სრულიად ამორალური, მიუღებელი

ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილე ალუდა ღუდუშაური გამოეხმაურა გიორგი კანდელაკის მიერ გამოქვეყნებულ კვლევას, სადაც წერია, რომ თბილისი ირანის მიერ აგენტების გადაბირებისა და ტერორისტული ოპერაციების ნაყოფიერ ნიადაგად იქცა.

დეპუტატმა კანდელაკის კვლევას ამორალური და მიუღებელი უწოდა.

„ბუნებრივია ეს არის ის სულისკვეთება, რაც მანამდე ჰქონდა „ნაციონალურ მოძრაობას". ზოგადად, არც სახელმწიფო აინტერესებს, არც ქართველი ხალხი. გამოკითხულია სახელმწიფო უსაფრთხოების სამსახურის მიერ და თუ ისინი ჩათვლიდნენ და შეაფასებდნენ მის ამ ქმედებას, ეს უკვე მათი კომპეტენციაა. ეს არის სრულიად ამორალური, მიუღებელი", - განაცხადა ღუდუშაურმა.

„ქართული ოცნების“ ხელმძღვანელობით, თბილისი ირანელი რეკრუტირებისა და ტერორისტული ოპერაციების ნაყოფიერ ნიადაგად იქცა, - ამ სათაურით აქვეყნებს ამერიკული გამოცემა The Washington Free Beacon სტატიას, რომლის ავტორი, ადამ კრედო, ოპოზიციის მხარდამჭერების - ჯო უილსონისა და ლუკ კოფის გარდა, ოპოზიციონერ გიორგი კანდელაკის განცხადებებსაც ეყრდნობა.

კანდელაკი აცხადებს, რომ ალ-მუსტაფას, რომელიც დონალდ ტრამპმა 2020 წელს ტერორისტულ ორგანიზაციად გამოაცხადა, საქართველოში უნივერსიტეტის სამი კამპუსი აქვს.