ანალიტიკოსი: ვაღიარებთ ამერიკას, როგორც ერთ-ერთ ძლიერ ძალას და ჩვენი გეოპოლიტიკიდან გამომდინარე გვინდა მასთან გვქონდეს კონკრეტული ტიპის დადებითი ურთიერთობა

ანალიტიკოსმა, ოთარ ჭულუხაძემ „დღის ქრონიკაში“ საქართველოსა და ამერიკის ურთიერთობაზე ისაუბრა. როგორც ანალიტიკოსმა აღნიშნა, ჩანს, რომ პოლიტიკური დინამიკა დათბობისკენ მიდის.

„აშკარად ჩანდა, რომ პოლიტიკური დინამიკა მიდიოდა დათბობისკენ, იგივე ამერიკის მხრიდან საქართველოს ელჩის მიღება, ეს იყო ამის ერთ-ერთი პირველი დასტური. ასევე იყო რამდენიმე საჯარო წერილი, რომელიც საქართველოს პოზიციონირებას ნათლად აყალიბებდა - წინა ადმინისტრაციის პოლიტიკა, რომელსაც თვითონ ტრამპი ემიჯნება, ჩვენც ამ მიდგომებს ვეწინააღმდეგებოდით. ვაღიარებთ ამერიკას, როგორც ერთ-ერთ ძლიერ ძალას და ჩვენი გეოპოლიტიკიდან გამომდინარე გვინდა მასთან გვქონდეს კონკრეტული ტიპის დადებითი ურთიერთობა, რაღაც ტიპის თანამშრომლობაზე დამყარებული“, - აღნიშნა ჭულუხაძემ.

დონალდ ტრამპმა ირაკლი კობახიძეს ამერიკის დამოუკიდებლობის იუბილეს მილოცვისთვის სამადლობელო წერილი გაუგზავნა, სადაც აღნიშნულია: სუვერენიტეტის, უსაფრთხოებისა და ხანგრძლივი კეთილდღეობის მხარდასაჭერად ერთობლივი მუშაობით შეგვიძლია მნიშვნელოვანი პროგრესის მიღწევა. მოუთმენლად ველი ჩვენი თანამშრომლობის გაძლიერებას, რათა ერთად ვიაროთ მეტად უსაფრთხო, აყვავებული და მშვიდობიანი მომავლისკენ