ანდრეი სიბიგა: რეალობა ნათლად მოწმობს ერთ რამეს: თუკი „ანკორიჯის სულისკვეთება“ საერთოდ არსებობდა, ახლა ის ნამდვილად მკვდარია

უკრაინის საგარეო საქმეთა მინისტრი ანდრეი სიბიგა რუსეთის ფედერაციიდან გაჟღერებულ ბოლო განცხადებებს გამოეხმაურა, რომლებიც აშშ-ის მიერ „ანკორიჯის სულისკვეთების“ შეთანხმებებიდან გადახვევას ეხება. სიბიგამ აღნიშნა, რომ ამის ნაცვლად მოსკოვმა ომის დასრულების შესახებ ნამდვილ მოლაპარაკებებზე უნდა იფიქროს.

მისი თქმით, რუსული მხარის გარდა არავის ესმის ბოლომდე, თუ რას გულისხმობენ ისინი ე.წ. „ანკორიჯის სულისკვეთებაში“, როდესაც რუსეთისა და აშშ-ის ლიდერების ალასკაზე გამართულ შეხვედრაზე მიღწეულ შეთანხმებებზე საუბრობენ.

„რეალობა ნათლად მოწმობს ერთ რამეს: თუკი „ანკორიჯის სულისკვეთება“ საერთოდ არსებობდა, ახლა ის ნამდვილად მკვდარია. რუსეთისთვის ანკორიჯის გაკვეთილი იმაში მდგომარეობს, რომ ნებისმიერი სამშვიდობო გეგმა, რომელიც უკრაინის მონაწილეობის გარეშე შემუშავდება, განწირულია იმისთვის, რომ სულად იქცეს და გაქრეს“, - დაწერა უკრაინის საგარეო საქმეთა მინისტრმა სოციალურ ქსელში.

მანამდე მოსკოვში განაცხადეს, რომ აშშ „აღარ არის ობიექტური შუამავალი“ რუსეთ-უკრაინის ომის მოლაპარაკებებში, რასაც თან ახლდა ანკორიჯის შეთანხმებების შეხსენებაც.