ანდრია ურუშაძე: რაც შეეხება საყოველთაო ჯანდაცვას, ის უნივერსალური ჯანდაცვის ქართული სინონიმია და ჩვენ ამ გზით მივდივართ, სადღაც ნახევარ გზაზე ვართ მისული

რაც შეეხება საყოველთაო ჯანდაცვას, ის უნივერსალური ჯანდაცვის ქართული სინონიმია და ჩვენ ამ გზით მივდივართ, სადღაც ნახევარ გზაზე ვართ მისული, - განაცხადა გადაცემაში „ღია ეთერი - დებატები“ ჯანდაცვის სპეციალისტმა ანდრია ურუშაძემ.

„გაიზარდა დაფინანსება, მაგრამ 50%-ს ამ ხარჯებისა მაინც ისევ ჯიბიდან აფინანსებს პაციენტი, მიუხედავად იმისა, რომ ძალიან გავზარდეთ სახელმწიფოს წილი“, - აღნიშნა ურუშაძემ.

ჯანდაცვის სპეციალისტი ეთანხმება მინისტრ მიხეილ სარჯველაძეს, რომ პრევენცია დღეს ერთ-ერთი მთავარი პრობლემაა.

„კი, პრევენცია არის ერთ-ერთი მთავარი პრობლემა, სკრინინგით მოცვა მათ შორის. ეს პრობლემები დიდი ხანია გვაქვს და უკვე დროა, საერთო გამოსავალი მოვძებნოთ, მათ შორის პაციენტებისა და ექიმების ჩართულობით და არა დაპირისპირებით ამ ჯგუფებთან და არა რომელიმე სექტორის დამნაშავედ გამოცხადებით, ეს მე არ მომწონს. ყოველთვის მგონია, რომ პრობლემის გამოსავალი მოიძებნება მხოლოდ თანამშრომლობით, დიალოგით და აქცენტის გაკეთებით იმაზე, რომ ჯანდაცვა გრძელვადიანად ვითარდებოდეს და არ იყოს დამოკიდებული პოლიტიკურ ცვლილებებზე“, - განაცხადა ანდრია ურუშაძემ.

ურუშაძე მინისტრს იმაშიც ეთანხმება, რომ დროა, ხარჯის მოცულობაზე მსჯელობიდან ქვეყანა გადავიდეს იმის შესახებ მსჯელობაზე, თუ რა შედეგი მოაქვს სახელმწიფოს მიერ გაღებულ ხარჯს.