AP: კარნი კანადის ევროკავშირის ასოცირებულ წევრობას მიესალმება

კანადის პრემიერ-მინისტრმა მარკ კარნიმ ევროკავშირის ინიციატივას კანადის ასოცირებულ წევრობასთან დაკავშირებით მხარი დაუჭირა, თუმცა აღნიშნა, რომ უფრო მჭიდრო თანამშრომლობა ახალი ბლოკის შექმნას და მსოფლიოს წამყვან ძალებთან დაპირისპირებას არ ისახავს მიზნად. ინფორმაციას Associated Press-ი ავრცელებს.

კარნის განცხადება მას შემდეგ გაკეთდა, რაც აშშ-ის პრეზიდენტმა დონალდ ტრამპმა კანადასა და ევროკავშირს შორის შესაძლო შეთანხმებას „მტრული ქმედება“ უწოდა და გააფრთხილა ევროპა, რომ თუ ვაშინგტონი მის განზრახვებს არაკეთილგანწყობილად შეაფასებს, შესაძლოა, ევროპულ საქონელზე მაღალი ტარიფები დააწესოს. ტრამპმა იდეას ასევე „სასაცილო“ უწოდა.

„ჩვენ მივესალმებით ამ ამბიციას“, - განაცხადა კარნიმ ევროპარლამენტში, სადაც ევროკომისიის პრეზიდენტის, ურსულა ფონ დერ ლაიენის ინიციატივას გამოეხმაურა. ფონ დერ ლაიენმა წინადადება ოთხშაბათს წარადგინა.

კარნიმ განმარტა, რას გულისხმობს კანადა-ევროპის უფრო მჭიდრო თანამშრომლობაში. მისი თქმით, საუბარია ვაჭრობის, თავდაცვის, კრიტიკული მნიშვნელობის მინერალების, ხელოვნური ინტელექტის, ენერგეტიკის, კოსმოსის, კვლევებისა და ფინანსური მომსახურების სფეროებში ინტეგრაციის გაღრმავებაზე, რათა ორივე მხარე ეკონომიკური და გეოპოლიტიკური ზეწოლის მიმართ ნაკლებად მოწყვლადი გახდეს.

„მე არ ვთავაზობ მესამე ბლოკის შექმნას, რათა დიდ ძალებს კონკურენცია გაუწიოს. ჩვენ არ ვცდილობთ ძალაუფლების მოპოვებას სხვებზე დომინირებისთვის“, - განაცხადა კარნიმ.

მისი თქმით, მიზანი კანადის მედეგობის გაძლიერებაა, რათა არცერთ ქვეყანას არ შეეძლოს კანადის ბაზრების კონტროლი, მისი სუვერენიტეტის შერყევა ან მისთვის გადაწყვეტილებების კარნახი.

Associated Press-ის ცნობით, ათწლეულების განმავლობაში კანადა საკუთარ ეკონომიკას შეერთებულ შტატებთან მჭიდრო ინტეგრაციაზე აშენებდა. თუმცა, ტრამპის მიერ დაწესებულმა ტარიფებმა, ეკონომიკური დათმობების მოთხოვნებმა და კანადის აშშ-ის 51-ე შტატად ქცევაზე პრეზიდენტის არაერთგზის გაკეთებულმა განცხადებებმა ოტავას უბიძგა, შეამციროს ეს დამოკიდებულება და ატლანტის ოკეანის გადაღმა უფრო მჭიდრო ეკონომიკური და პოლიტიკური ურთიერთობები დაამყაროს.