აფხაზეთის მთავრობამ 700-მდე დევნილ ბენეფიციარს მთელი ქვეყნის მასშტაბით სასოფლო-სამეურნეო ტექნიკა გადასცა

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე სოფელ ჭაქვინჯში აფხაზეთიდან დევნილ ფერმერ გელა კეშელავას ესტუმრა, რომელსაც აფხაზეთის მთავრობისგან მოტობლოკი და თხილის შესაწამლი აპარატი გადაეცა.

მთავრობის თავმჯდომარე ბენეფიციარს აფხაზეთიდან დევნილი მოსახლეობის მხარდამჭერი პროგრამის და მისი შედეგების შესახებ ესაუბრა და გადაცემული ტექნიკა დაათვალიერა. „ვაგრძელებთ დევნილი მოსახლეობის მხარდაჭერას და მათ ეკონომიკურ გაძლიერებას. მიმდინარე წელს, მთელი ქვეყნის მასშტაბით, მოტობლოკები და სხვა სასოფლო-სამეურნეო ტექნიკა 700-მდე დევნილ ბენეფიციარს გადავეცით. აღნიშნული ინიციატივა მიზნად ისახავს აფხაზეთიდან დევნილი ფერმერების საქმიანობის ხელშეწყობას და მათი სოციალურ-ეკონომიკური მდგომარეობის გაუმჯობესებას“, - აღნიშნა გიორგი ჯინჭარაძემ.

შეხვედრაში აფხაზეთის ავტონომიური რესპუბლიკის ფინანსთა და ეკონომიკის მინისტრი თენგიზ ნასარიძე და აფხაზეთის ჯანმრთელობისა და სოციალური დაცვის მინისტრი ბესიკ კუსიდი მონაწილეობდნენ.

აფხაზეთის ავტონომიური რესპუბლიკის მთავრობამ, აფხაზეთის ფინანსთა და ეკონომიკის სამინისტროს პროგრამების ფარგლებში, 2026 წელს მთელი ქვეყნის მასშტაბით 700-მდე დევნილ ბენეფიციარს სასოფლო-სამეურნეო ტექნიკისა და სასუქების შესყიდვა დაუფინანსა.

ინფორმაციას აფხაზეთის ავტონომიური რესპუბლიკის მთავრობა ავრცელებს.