„არ მაინტერესებს სააკაშვილის ბრძანებაში რა წერია, რადგან ისტორიული ფაქტია, რომ რუსეთმა საქართველოს სახელმწიფო საზღვარი გადმოლახა 7 აგვისტოს“ - ბოლო რამდენიმე წელია ოპოზიციამ აგვისტოს ომის თარიღი შეცვალა

ბოლო რამდენიმე წელია ოპოზიციამ აგვისტოს ომის თარიღი შეცვალა. 2013 წლის ჩათვლით, ისინი აგვისტოს ომის წლისთავს 8 აგვისტოს აღნიშნავდნენ. თუმცა ხელისუფლების ცვლილების შემდეგ თარიღი 7 აგვისტოთი შეცვალეს. ასევე აღსანიშნავია, მაშინდელი პრეზიდენტი სააკაშვილი 9 აგვისტოს ბრძანებულებაში წერდა, რომ როკის გვირაბის გავლით საქართველოში რუსეთის ფედერაციის ასეულობით სამხედრო პირი და სამხედრო ტექნიკა სწორედ 8 აგვისტოს შემოვიდა.

„გარკვეულ პერიოდში დაზუსტდა, რომ 7 აგვისტოს დაიწყო ინტერვენცია. მე სააკაშვილის ამბავი არ ვიცი. ბევრი [რუსეთის ფედერაციის სამხედრო] შემოვიდა, ანუ უფრო ფართო იყო 8 აგვისტოს“, - განაცხადა „ევროპული საქართველოს“ თავმჯდომარე გიგი წერეთელმა.

„საერთოდ არ მაინტერესებს სააკაშვილის ბრძანებაში რა წერია, იმიტომ რომ, ისტორიული ფაქტია, რომ რუსეთმა საქართველოს სახელმწიფო საზღვარი გადმოლახა 7 აგვისტოს“, - აღნიშნა ოპოზიციონერმა პოლიტიკოსმა თეონა აქუბარდიამ.

„არ მაინტერესებს დადგენილებები, დღეს როდესაც ეს ომი უკვე არის ისტორიული მოვლენა, უნდა შევაფასოთ ისტორიული დოკუმენტების შესაბამისად. საკმაოდ დოკუმენტირებული ომია, საბრძოლო მოქმედებები, საქართველოს სამხედრო ნაწილებზე თავდასხმები დაიწყო დღეს“, - განაცხადა „ლელოს საქართველოსთვის“ წევრმა თაზო დათუნაშვილმა.