არჩილ გორდულაძე: გერმანიასა და საქართველოს ისტორიულად აქვთ ძალიან კარგი ურთიერთობა და ამ ურთიერთობის მეთოდური ნგრევით იყო დაკავებული გერმანიის ყოფილი ელჩი, ბატონი ფიშერი, რომელსაც ელჩის სახელი უბრალოდ ჰქონდა, თორემ სრულად გასული იყო დიპლომატიური ჩარჩოდან

იურიდიულ საკითხთა კომიტეტის თავმჯდომარე არჩილ გორდულაძე საქართველოსა და გერმანიას შორის ურთიერთობების გადატვირთვის მოლოდინებზე საუბრობს.

მისი თქმით, ორ ქვეყანას შორის ურთიერთობებს ყოფილი ელჩი ფიშერი ანგრევდა.

„გერმანიასა და საქართველოს ისტორიულად აქვს ძალიან კარგი ურთიერთობა და ამ ურთიერთობის მეთოდური ნგრევით იყო დაკავებული გერმანიის ყოფილი ელჩი, ბატონი ფიშერი, რომელსაც ელჩის სახელი უბრალოდ ჰქონდა თორემ სრულად გასული იყო ყველა დიპლომატიური ჩარჩოდან და სტანდარტიდან. მნიშვნელოვანია, რომ საქართველოს ჰყავდეს ელჩი გერმანიაში, შესაბამისად, ჩვენი ქვეყნის ინტერესები დაფიქსირებული იყოს გერმანიის სახელმწიფოსთან და ამავდროულად ორ ქვეყანას შორის ურთიერთობა იყოს ისე, როგორც ეს შეეფერება ქართველ და გერმანელ ხალხს“, - განაცხადა არჩილ გორდულაძემ.

საქართველოს ელჩი გერმანიაში, გერმანიის პრეზიდენტისთვის რწმუნებათა სიგელების გადასაცემად ემზადება. ცერემონია ხვალ გაიმართება. შესაბამისი დოკუმენტების გადაცემას დიპლომატი რამდენიმე თვის განმავლობაში ელოდა. ალექსანდრე კარტოზიას მიერ გერმანიის პრეზიდენტისთვის რწმუნებათა სიგელების გადაცემის ცერემონიის ჩანიშვნის პარალელურად, გერმანიის საგარეო საქმეთა სამინისტროს ოფიციალური ვებ-გვერდიდან წაიშალა ის გვერდი, სადაც სალომე ზურაბიშვილი საქართველოს მოქმედ პრეზიდენტად იყო მოხსენიებული.