არჩილ გორდულაძე: რაც კარგია ამ ქვეყნისთვის, რა თქმა უნდა უარყოფითია კოლექტიური „ნაცმოძრაობისთვის“ და ამ ბოღმის ნთხევას ვხედავთ მათივე მართული ტელევიზიებისგან

ეს მხოლოდ და მხოლოდ არის პოზიტიური და რადგანაც ეს არის მხოლოდ დადებითი ჩვენი ქვეყნისთვის, ამას კოლექტიური ნაცმოძრაობა ჭკუიდან გადაჰყავს, - განაცხადა იურიდიულ საკითხთა საპარლამენტო კომიტეტის თავმჯდომარემ, არჩილ გორდულაძემ, რითაც გამოეხმაურა ბიძინა ივანიშვილის მორიგ ქველმოქმედებაზე ოპოზიციის სპეკულაციებს. საუბარია ფონდი „ქართუს“ მიერ „ციცინათელას“ პარკის მიმდებარედ არსებული მიწის ნაკვეთის სახელმწიფოსთვის უსასყიდლოდ გადაცემის ფაქტზე.

„ფულის გათეთრებასთან დაკავშირებული ტყუილები, ისეთივე სიმართლეა, როგორიც მაგალითად ის, რომ დენდროლოგიურ პარკში ადამიანები ვერ შეძლებენ უფასოდ შესვლას. რაც კარგია ამ ქვეყნისთვის, რა თქმა უნდა უარყოფითია კოლექტიური ნაცმოძრაობისთვის და ამ ბოღმის ნთხევას ვხედავთ მათივე მართული ტელევიზიებისგან“, - განაცხადა გორდულაძემ.

საქველმოქმედო ფონდ „ქართუსა“ და სახელმწიფო ქონების ეროვნულ სააგენტოს შორის შეთანხმება შედგა, რომლის თანახმად, „ციცინათელას“ პარკთან მდებარე არასასოფლო-სამეურნეო დანიშნულების მიწის ნაკვეთი, შპს „აკვა ცენტრისგან“ შეიძინა ფონდმა „ქართუმ“ და იგი სახელმწიფოს უსასყიდლოდ გადასცა.