აშშ-ის ეროვნული დაზვერვა: ალერგიისა და ინფექციურ დაავადებათა ინსტიტუტის ყოფილი ხელმძღვანელი ენტონი ფაუჩი უჰანის ლაბორატორიის კვლევებს აფინანსებდა და COVID-19-ის წარმოშობის შესახებ ინფორმაციის დამალვას ცდილობდა

COVID-19-ის პანდემიამდე აშშ-ის ალერგიისა და ინფექციური დაავადებების ეროვნული ინსტიტუტის (NIAID) ხელმძღვანელმა ენტონი ფაუჩიმ ამერიკელი გადასახადის გადამხდელების მილიონობით დოლარი გამოყო უჰანის ვირუსოლოგიის ინსტიტუტში ღამურების კორონავირუსებზე ე.წ. „ფუნქციის გაძლიერების“ (gain-of-function) კვლევების დასაფინანსებლად. ინფორმაციას აშშ-ის ეროვნული დაზვერვა ავრცელებს.

როგორც ეროვნული დაზვერვის მიერ გამოქვეყნებულ ინფორმაციაშია აღნიშნული, სწორედ აღნიშნული კვლევები მიიჩნევა დღეს ფართოდ იმ არაგანზრახ ლაბორატორიულ გაჟონვასთან დაკავშირებულ საქმიანობად, რომელმაც COVID-19-ის პანდემიას დაუდო საფუძველი.

გამოქვეყნებული დოკუმენტების თანახმად, ფაუჩი აქტიურად მონაწილეობდა COVID-19-ის წარმოშობის შესახებ დაზვერვის შეფასებების ფორმირებაში და გავლენას ახდენდა მათ შინაარსზე. განცხადებაში ასევე ნათქვამია, რომ მან 2024 წელს კონგრესში ფიცის ქვეშ მიცემული ჩვენების დროს არასწორი ინფორმაცია წარადგინა, როდესაც უარყო დაზვერვის წარმომადგენლებთან ვირუსულ კვლევებზე განხილვებში მონაწილეობა.

„COVID-19-ის პანდემიამ უზარმაზარი ტკივილი და სირთულეები მოუტანა მილიონობით ამერიკელსა და მსოფლიოს მრავალ მოქალაქეს. წლების განმავლობაში გავრცელებული სიცრუის, ცენზურისა და ინფორმაციის დაფარვის შემდეგ, ამერიკელი ხალხი იმსახურებს გამჭვირვალობას, სიმართლესა და ანგარიშვალდებულებას“, - განაცხადა აშშ-ის ეროვნული დაზვერვის ხელმძღვანელმა ტულსი გაბარდმა.

გაბარდის თქმით, სიმართლის დამალვისთვის გამოყენებული მეთოდები „დიფ სთეითის“ მოქმედების სტილს ჰგავს. გაბარდი ამტკიცებს, რომ ფაუჩიმ საკუთარი ქმედებების დასაფარად დაზვერვის მონაცემებით მანიპულირება მოახდინა, კონგრესს არასწორი ინფორმაცია მიაწოდა და ქვეყნის უსაფრთხოებისთვის მნიშვნელოვანი ფაქტების შესახებ ინფორმაციის ხელმისაწვდომობა შეზღუდა.

გამოქვეყნებულ დოკუმენტებში ასევე აღნიშნულია, რომ ფაუჩის რეკომენდაციები ხშირად აისახებოდა დაზვერვის ოფიციალურ შეფასებებში, ხოლო მისი მხარდაჭერით მომზადებული სამეცნიერო ნაშრომები დაზვერვის თანამეგობრობისთვის სანდო წყაროებად განიხილებოდა.

გაბარდის მიერ გავრცელებული მასალების თანახმად, რამდენიმე მამხილებელმა განაცხადა, რომ ლაბორატორიული გაჟონვის ჰიპოთეზის მხარდამჭერი ანალიტიკოსები ხელმძღვანელობის მხრიდან ზეწოლას განიცდიდნენ. მათ შორის მოყვანილია შემთხვევები, როდესაც თანამშრომლებს კარიერული წინსვლის პერსპექტივების დაკარგვით აშინებდნენ ან მათი საჩივრების ანონიმურობის დაცვა სათანადოდ არ ხდებოდა.