აშშ-ში, საჰაერო შოუს დროს, ერთმანეთს 2 თვითმფრინავი შეეჯახა

აშშ-ში, ავიაშოუს დროს, ორი გამანადგურებელი ჰაერში ერთმანეთს შეეჯახა. ოფიციალური პირების განცხადებით, ეკიპაჟის ოთხივე წევრის მდგომარეობა სტაბილურია.

ინციდენტი კვირას, აიდაჰოს შტატში მდებარე Mountain Home-ის ავიაბაზიდან ჩრდილო-დასავლეთით მოხდა. შემთხვევა ავიაშოუ Gunfighter Skies-ის მეორე და დასკვნით დღეს დაფიქსირდა. შეჯახების შედეგად ხანძარი გაჩნდა, რის გამოც ბაზა დროებით ჩაიკეტა, ავიაშოუს დარჩენილი ნაწილი კი გაუქმდა.

როგორც აშშ-ის სამხედრო-საზღვაო ძალების წარმომადგენელმა BBC-ს განუცხადა, ეკიპაჟის ყველა წევრმა შეძლო კატაპულტირება EA18-G ტიპის თვითმფრინავებიდან, რომლებიც საჩვენებელ ფრენას ასრულებდნენ. ჯერჯერობით უცნობია, მიიღეს თუ არა მათ დაზიანებები. მომხდარზე მიმდინარეობს გამოძიება.