აშშ-ში უკრაინის ყოფილ ელჩს ოლგა სტეფანიშნას სასამართლომ 130 ათასი დოლარის ოდენობის გირაო შეუფარდა

უკრაინის უმაღლესმა ანტიკორუფციულმა სასამართლომ უკრაინის ყოფილ ელჩს აშშ-ში ოლგა სტეფანიშინას კორუფციის საქმეზე 6 მილიონი გრივნის (დაახლოებით 130 ათასი დოლარი) ოდენობის გირაო შეუფარდა. ინფორმაციას უკრაინული მედია ავრცელებს.

მედიის ცნობით, სტეფანიშინას უკანონო გამდიდრებას ედავებიან. მანამდე სპეციალიზებულმა ანტიკორუფციულმა პროკურატურამ სასამართლოსთვის 13 მილიონი გრივნის (დაახლოებით 290 ათასი დოლარი) ოდენობის გირაოს შეფარდების შუამდგომლობით მიმართა.

პროკურორის განცხადებით, სტეფანიშინამ დეკლარაციაში არ ასახა ორი ბინა, ასევე თანხები, რომლებიც ამ ბინების რემონტს, დედის მკურნალობას, ავიაბილეთებისა და კიდევ ერთი ბინის ქირას მოხმარდა.

გამოძიების ინფორმაციით, მან ასევე არ მიუთითა, რომ სარგებლობდა ერთ-ერთი დაქვემდებარებული თანამშრომლის სახელზე რეგისტრირებული Mercedes-ის ავტომობილით.

პროკურორის თქმით, სტეფანიშინა სხვა პირებსაც აძლევდა მითითებებს, მის ნაცვლად შეეძინათ აქტივები. გამოძიების შეფასებით, ყოფილი ელჩის ხარჯები მის ოფიციალურ შემოსავლებსა და დანაზოგებს მნიშვნელოვნად აღემატებოდა.

პროკურორის განცხადებით, წელიწად-ნახევრის განმავლობაში სტეფანიშინას მიერ შეძენილი აქტივების საერთო ღირებულებამ 13,9 მილიონი გრივნა (დაახლოებით 310 ათასი დოლარი) შეადგინა.

გამოძიების ვერსიით, სტეფანიშინა 2024 წელს კორუფციის პრევენციის ეროვნული სააგენტოს (NACP) ხელმძღვანელის შესარჩევ კონკურსშიც ჩაერია. პროკურატურის ინფორმაციით, მან ხელისუფლებისადმი ლოიალურ საკონკურსო კომისიის წევრებს კონკრეტული კანდიდატების, მათ შორის ვიქტორ პავლუშჩიკის, მხარდაჭერისკენ მოუწოდა. მოგვიანებით სწორედ პავლუშჩიკი დაინიშნა სააგენტოს ხელმძღვანელად.

ანტიკორუფციული ორგანიზაციები პავლუშჩიკს ხელისუფლების პოლიტიკური ინტერესების გატარებასა და არაეფექტურობაში ადანაშაულებენ, რასაც ის უარყოფს.

პროკურატურის მიერ წარმოდგენილი მიმოწერის თანახმად, სტეფანიშინას ერთ-ერთ შეტყობინებაში ნათქვამია, რომ უკრაინის ეროვნული ანტიკორუფციული ბიუროს (NABU) დეტექტივების დეპარტამენტის ხელმძღვანელსა და NACP-ის ხელმძღვანელობის კანდიდატს, ოლექსანდრ სკომაროვს, „30 ქულა არავითარ შემთხვევაში არ უნდა მიეღო“ და მისთვის „რაც შეიძლება ნაკლები ქულა უნდა დაეწერათ, რადგან ის უკვე მაქსიმუმთან ახლოს იყო“.

აღსანიშნავია, რომ უკრაინის პრეზიდენტმა ვოლოდიმირ ზელენსკიმ სტეფანიშინა აშშ-ში ელჩის თანამდებობიდან 3 აგვისტოს გაათავისუფლა. სტეფანიშინა 2025 წელს აშშ-ში ელჩად დანიშვნამდე 2020-2025 წლებში ევროპული და ევროატლანტიკური ინტეგრაციის საკითხებში ვიცე-პრემიერი იყო, ხოლო 2024-2025 წლებში იუსტიციის მინისტრის პოსტსაც იკავებდა.