„ასტონ ვილამ“ ევროპა ლიგა მოიგო

ბირმინგემის „ასტონ ვილამ“ ისტორიაში პირველად მოიპოვა ევროპა ლიგის ჩემპიონის ტიტული. სტამბოლში, „ბეშიქთაშის“ საშინაო არენაზე გამართულ ფინალურ შეხვედრაში ინგლისურმა კლუბმა გერმანული „ფრაიბურგი“ დამაჯერებელი ანგარიშით, 3:0 დაამარცხა.

მატჩის ბედი, დიდწილად, პირველივე ტაიმის მიწურულს გადაწყდა. ანგარიში 41-ე წუთზე იური ტილემანსმა გახსნა, ხოლო მსაჯის მიერ კომპენსირებულ დროში (45+3) ემილიანო ბუენდიამ ბირმინგემელთა უპირატესობა ორამდე გაზარდა. შეხვედრის საბოლოო წერტილი 58-ე წუთზე მორგან როჯერსმა დასვა.

ეს გამარჯვება განსაკუთრებული აღმოჩნდა „ასტონ ვილას“ ესპანელი მწვრთნელისთვის, უნაი ემერისთვის. ის ევროპა ლიგის გამარჯვებული კარიერაში უკვე მეხუთედ გახდა, რაც აბსოლუტური რეკორდია და სხვა არცერთ მწვრთნელს მსგავსი შედეგი არ აქვს.

ემერიმ ტურნირი სამჯერ „სევილიასთან“, ერთხელ „ვილიარეალთან“, ახლა კი უკვე „ასტონ ვილასთან“ ერთად მოიგო. გარდა ამისა, მის აქტივში „არსენალთან“ ერთად ამავე ტურნირის ფინალში გასვლაც ფიქსირდება.

ბირმინგემელებს აქამდე ევროპა ლიგის/უეფას თასის მეოთხედფინალზე შორს არასდროს მიუღწევიათ. თუმცა, კლუბს უფრო მდიდარი ევროპული ისტორია აქვს - 1982 წელს მათ ევროპის ჩემპიონთა თასი და უეფას სუპერთასი მოიგეს.

გერმანული კლუბისთვის ეს ევროტურნირების ისტორიაში პირველი ფინალი იყო. აქამდე მათი საუკეთესო შედეგი ტურნირის მერვედფინალში გასვლა იყო - 2023 და 2024 წლებში.